Гюльнара Мягьямедова
Февралин 24-пи йигъан Урусатди Украинайиъ хусуси метлеб айи дявдин операция ккебгъну 4 йис тамам гъабхьну. 2022-пи йисан 24-пи феврали гвачIнинган сяаьт 5-ди Урусатдин Яракьлу кьувватари Украинайин дявдин дараматариз ракетйириан бомбар йивуз хъюгънийи, хъа гъураба кьушмар швнубна саб терефнаан, гьадму гьисабнаъди Крымдиан, Белоруссияйин терефнаанра кади, Украинайин жилариина гъафнийи.
Магьа хусуси метлеб айи дявдин операция давам шули, хьудпи йис гъябгъюра. Думу дявдин гьяракатар, душмандин кьушмаризси, ихь эскраризра гизаф гъагъидар ву. Кьюбиб терефаринра дивнайи планар тамам духьнадар. Украинайин тереф уьбхюри, дурар гьарсаб яракьдихъди тямин апIурайи Западдин политикари дявдин операция ккудубкIуз гъитрадар.
Урусатдин кьушмари азад апIурайи гьарсаб километрихъан туврайи кьимат лап аьхюб ву – ихь эскрарин уьмрар, хъа душмандин терефназ духьнайи зарарар хъана аьхюдар ва гъагъидар ву.
Дагъустанлуйир дявдин операция ккебгъу садпи йигъариланмина дирбаш’валин нумуна улупури, дявдин женгариъ иштирак шула. 2022-пи йисан 25-пи феврали, Донбасс миллетчйириккан азад апIури, Дагъустандиан вуйи Нурмягьямад Гьяжимягьямадов игитси гъакIнийи. Думу хусуси метлеб айи дявдин операцияйиъ Урусатдин Федерацияйин сарпи Игит гъахьнийи.
Хусуси метлеб айи дявдин операция гъябгъюрайи 4 йисандин арайиъ Дагъустандиан вуйи дявдин 19 гъуллугъчи Урусатдин Федерацияйин Игитар гъахьну. Думу сиягьнаъ Урусатдин Игит ччвур гъадабгъу кьюрпи дагъустанлу, ихь машгьур генерал-майор Эседулла Абачев ву, юкьурпир ихь дирбаш Руслан Къурбанов, хьурпир ихь Исрафил Мягьямадов (йикIбан кьяляхъ), 18-пир – Дербент райондиъ яшамиш шулайи Табасаран райондин Куркакк гъулан вакил полковник Ярамир Темирханов. Гъийин йигъаз думу табасаран халкьдин арайиъ Урусатдин Игит ччвур гъадабгъу хьурпи кьягьял ву.
Ватан уьбхрударин йигъаз бахш вуйи чан тебрикнаъ Табасаран райондин кIулиъ айи Мягьямед Къурбановди хусуси метлеб айи дявдин операцияйиъ чпин эскервалин буржи тамам апIурайи ватанагьлийирихьна (дурарин кьадар 4 агъзурилан зиина ву) вуйи чан гьюрмат улупнийи. «Частарин командирарихьан чухсагъул мялум апIури гъюрайи кагъзариъ ихь эскрарин дирбаш’вализ заан кьимат тувра. Уьлкейиз варитIан читинди вуйи вахтна Ватан уьбхюз гъудужвну, чпин кьягьялвал ва вафалувал улупдариинди дамагъ апIурахьа. Гьацдар жюр’этлу эскрарин гьюрмат гьарган кIваъ уьбхидихьа, дурарин гьунарари ухьук гьевес капIра», – гъапну муниципалитетдин главайи.
Хусуси метлеб айи дявдин операцияйи Украинайин кьувват лап аьжуз гъапIну. Табиаьтдин аьхю девлетар хъайи Урусатди душмандин кьувват яваш-явашди бугъмиш апIура. Хъа ухьуз рябкъюрайиси, Урусатди саб Украинайихъди ваъ, сатIи дубхьнайи Западдихъди женг гъабхура. Ихь уьлкейин ригъ алабхъру терефнаъ айи уьлкйириин хъугъвал илимдар. Стамбулиъ ва жара йишвариъ кIули гъуху мясляаьатарин кьяляхъ Киевди гьапIраш гъябкъиган, гъийитIу йикьрар саб кепкинна кадрудар вуйиб рябкъюрахьуз.
Киевдиз Урусатдин гьюкуматдихъди аьлакьалу вуйиб вари тIанкь апIуз ккунди ашра, Урусатди азад дапIнайи жилариина инсанар аьхю шадвалиинди кьяляхъ гъюра. Украинайин миллетчйирин гьюжмикк гъузнайи агьалйир азад апIуб ихь яракьлу кьувватарин улихь дийибгънайи месэла вуди гъубзра.
Хусуси метлеб айи дявдин операция давам шулайи вахт гьисабназ гъадабгъиш, думу Ватандин Аьхю дявитIан артухъ вахтна кIули гъябгъюра. Гьелбетда, гъийин деврин дявдин операция Ватандин Аьхю дявдихь тевуб дюз дар. Гьамусдин дявдин женгар гизафси техникайин хъуркьувалариинди гъахурайидар ву. Гьаци вушра, Урусат чав чан улихь дивнайи метлебарин гъавриъ а: уьлкейиъ экономикара мюгькам дубхьна, яракьнан кьувватра аьхб ву, гъалибвалихьна вуйи рякъюъ эскрарин рюгьра ижмиди ву.
Вари ухьу зиихъ гъапибси вушра, хусуси метлеб айи дявдин операция шлубкьан ухди ккудубкIуб дугъри фикрин инсанарин кIван мурад ву. Думу гьяракатарин хьуд йис даршул, дурар гьаму йисан ккудукIур кIури, умуд кивурхьа.
