Гюльнара Мягьямедова
6-пи апрели Урусатдин космонавтикайин гьяфта ачмиш гъабхьну. Думу Гьяфта 6–пи апрелиан 12-пи апрелизкьан давам хьибди. Ихь уьлкейин космонавтикайин тарихдиъ гьаму жюрейиинди яркьуди Космонавтикайин йигъ сабпи ражари къайд апIура.
Гьамусяаьт Варихалкьарин космический станцияйиъ (МКС) лихурайи Роскосмосдин космонавтар Сергей Микаевди, Сергей Кудь-Сверчковди ва Андрей Федяевди ихь уьлкейин агьалйир Урусатдин космосдин сабпи гьяфта ккебгъбахъди тебрик гъапIну. «Космосдин сабпи гьяфта, ракетйиринна космосдин цирклизси, вари ихь уьлкейизра аьхю гьядиса ву. Космосдин гьяфта къайд апIбан гьякьнаан вуйи Урусатдин Федерацияйин президент Владимир Путиндин указди гьамусдихъантина гьар йисан гьюкуматди космонавтикайин артмиш’вализ асас фикир тувуз ккайивал улупура», – гъапну Сергей Кудь-Сверчковди.
Космосдин гьяфта аьршдин бушлугъариз сабпи ражари инсан дитIирхну 65 йис тамам хьувалихъди аьлакьалуди гъабхурайиб ву. Советарин Союздин космонавт Юрий Гагаринди инсаниятдиз хядарихьна вуйи рякъ ачмиш дапIну, чан ччвур тарихдиъ гъибтну.
Гьамусра Урусатдин заваринна космосдин кьушмарин кьувватар явашди дар. Апрелин 3-пи йигъан Архангельский областдиъ айи Плесецк космодромдиан военный спутникра хьади «Союз-2.1а» кьялан классдин ракета деебтну. Гьадму йигъан спутник орбитайиина адапIну. Космосдин аппаратдихъди жилилан телеметрикайин аьлакьа уьбхюра.
6-пи апрели, Космонавтикайин гьяфтайин садпи йигъан, Урусатдин вари регионариъ илимдин, образованиейин, яратмишарин ва культурайин серенжемар кIули гъушну.
Мектебариъ «Важиблу сюгьбатар» темайиан дарсар гъахура. Сюгьбатар гъахру вахтна 20,5 миллиондилан зиина мектебариъ ва колледжариъ урхурайидариз гьамусдин деврин космонавтикайин тарихдикан цIийи мялуматар ва «Космонавт хьпан бадали гьапIну ккунду?» суалназ жавабар тувну. Студентариз ва мектебариъ урхурайидариз космос лап ярхла даруваликан, космосдин технологйир ихь гьар йигъандин уьмрин аьхюну пай вуйиваликан ктибтну.
6-пи апрели космосдин темайиан Европайиъ варитIан ягъал экспозиция ачмиш гъапIну. Космосдин гьяфтайи Роскосмосди «Останкино» телецентрихъди сатIиди 337 метр ягълишнаъ, Европайиъ шагьрариъ варитIан ягъал вуйи лигуз шлу майдандиъ выставка тешкил гъапIну.
7-пи апрели сарпи дишагьли-космонавт Валентина Терешковайин ччвурнахъ хъайи космосдин милли центриъ «Аьгъювалар хьади космосдиз» кIул тувнайи Мярифатнан марафон гъубхну. Сабпи ражари Роскосмосдин штабдин хулар фестивалин майдандиз илтIикIну. Душваъ машгьур экспертарихъди гюрюшмиш гъахьну, яратмишарин устадвалин классар кIули гъухну. Серенжемариъ 1200-диинакьан инсанар иштирак гъахьну.
8-пи апрели Москвайин авиацияйин институтдиъ Роскосмосдин «Гележегдин команда» ракетйиринна космосдин цирклин 200-дилан зиина жигьил пишекрар форумдиз уч гъахьну.
Урусатдин космонавтика, гьюкуматдин космосдин ляхин идара апIурайи «Роскосмос» корпорация жанлуди артмиш шулайи циркил ву.
Гьамци Космосдин гьяфтайин гьарсаб йигъ серенжемарихъди абцIна. 12-пи апрели, Космонавтикайин йигъан, Космосдин гьяфтайин асас машквар къайд апIиди. Думу йигъан чпин зегьметниинди, дирбаш’валиинди ва жан гьяйиф дарапIди аьршдин бушлугъар инсандиз мютIюгъ дапIну машгьур гъахьи касар кIваин апIиди.
