Гюльнара Мягьямедова
6-пи апрели Дагъустандин глава Сергей Меликовди республикайиъ айи аьгьвалатназ дилигну, оперативный штабдин заседание гъубхну.
5-пи апрели Дагъустандиз хъана аьхю мархьар гъургъну. Гьаму ражари варитIан аьхю завал Дербент райондиз гъафну. Душваъ шту ккаънайи хулар-йишвариан 4 агъзур агьали адаъну, дурар вахтназди яшамиш шлу йишвариз гьаъна.
Гьяракатниинди кюмек тувру гъуллугъари шту ккаънайи ва хъана хатIа гъюз мумкинвал айи йишвариъ ляхин гъабхура.
Рякъяриин ляхин гъабхурайи гъуллугъари рякъяр гьутIубччвнайи жилихьан, ахьнайи гъванарихьан марцц апIура.
Энергетикари аквар хъадатIнайи гъулар-шагьрариъ подстанцйир рас апIури, аквар хъитIра, мобильный аьлакьа къайдайиз хура. Аьхю зарар гъабхьи районариъ медицинайин гъуллугъчйири, волонтерари кюмекар апIура, шид ва жара чарасуз лазим вуйи сурсатар хъиркIра.
Табиаьтдин завалин вахтна гъийиху инсанарин хизанариз республикайин правительствойин резервдин фонднаан кюмек тувди.
Тялукь органарин вакилари нирин багахь хулар тикмиш апIбан гьякьнаан ахтармишарра гъахиди. «Нирин кьирин багахь хулар тикмиш дапIна. Мидланра савайи, ахтармишар гъахру органари думу хулар даргъурайидар вуйивалин гьякьнаан улихьна вахтна документарра гьязур дапIнади гъахьну. Вижнасузвал дубхьну ккундар, хъа узуз гъарашугъарихьна илтIикIуз ккундузуз. Накьна гъи гъуллугъниин дерккнайи касди 13-15 йис улихьна деету гъалатIарихъан жаваб тувну ккундар. Гъийин гъуллугъчйири, чпин жандиз хатIа айивализ дилигди, авария дубхьнайи йишвариин ляхин апIура. Гьадму хулар тикмиш апIуз ихтияр туву касар фужар вуш дагну ккунду», – гъапну Дагъустандин главайи заседаниейиъ.
КIваина хурача, 5-пи апрели Сергей Меликов Мягьячгъалайиъ гизаф квартирйир ккайи хуларик капIнайи шубуб мертебайин хулар ахьу йишв’ина гъушнийи. Дугъу инсанариз хатIалу йишв’ин хулар тикмиш апIуз ихтияр туву гьякимарин къарарар ахтармишар апIуб жавабдар органариз табшурмиш гъапIну.
Мягьячгъалайин мэр Жамбулат Са-лавовди гъапиганси, Айвазовскийин ччвурнахъ хъайи кючейиъ хулар тикмиш гъапIдари хайлин къайдасузвалар деетна.
Гьамусяаьт ерли гьюкмари 4 хулар ахтармиш апIура, агьалйириз чпин документар ва чарасуз лазим вуйи мутму адабгъуз ихтияр тувна. «Мархьар ургъуз хъюгъган, гизаф мертебйирин шубудар хулариан инсанар адаънийи, гьаддиз гъийихдар гъахьундар. Гъвалахъ хъайи хулариъ яшамиш шулайи инсанарра, 100-диинакьан квартирйириан 300-тIан артухъ инсанар, гьадму гьисабнаан 115 бицIидар адаънийча. Дурар вари гостиницйириз ва вахтназди яшамиш шлу йишвариз гьаънийча. Дурар мани хурагнахъдира тямин дапIна», – ктибтнийи Салавовди.
Нубатнан мархьар ургъбан кьяляхъ Дагъустандиъ арайиз дуфнайи аьгьвалатнакан премьер-министр Рамазан Жяфаровди мялумат тувнийи. Дугъу къайд гъапIганси, электричествойин аквар адарди агьалйир яшамиш шулайи 220 гъулар-йишвар гъузну, гьадму гьисабнаан 48 агъзур кас Мягьячгъалайиъ «Восточная» ва «Приморская» подстанцйир шту ккаънайивалиан.
«Восточная» подстанция рас дапIна, «Приморская» подстанцияйиан шид адабцIура, гьамус энергетикар ляхнихъ хъюгъна.
Дербентдиъ «Аэропорт» микрорайондиз гизаф шид дуфна, агьалйир жара йишвариз адаъна.
КIежхин шид уч апIурайи аьхю дагар гьутIубччвну, йицIбариинди хулар шту ккаъну, агьалйир думу хулариан хатIасуз йишвариз адаъну. Мамедгъала гъулан багахь хьайи федеральный трасса гъябгъюрайи гъяд шту ккапIну, шту шубуб машин ккитIикIну, машинариъ айи 7 касдиз кюмек тувну, амма дадана дугъан велед гъийихну. Штар улучIвувалин натижайиъ Дербент райондиъ хъана шубур кас гъийихну.
Къяйтагъ райондиъ Уллучай нириъ айи шид за гъабхьну, Кирки кIуру гъулаъ, жил гьутIубччвну, кьюдар хулар ккаъну. Дарагънайи хулариъ дишагьлийин майит гъибихъну.
Совещаниейиъ Сергей Меликовди гъапиганси, Дагъустандиъ айи аьгьвалат гьюкмин вари органари гюзчиваликк уьбхюра.
«Федеральный гьюкмин органарира ухьуз кюмек тувра. Дагъустандин ругариин чарасуз гьялнаан саб тяйин вуйи къайда дебккбан месэла тартиб апIидихьа. Диди агьалйириз гъахьи зарар ккебкбан бадали, региондин дакьатарси, федеральный бюджетдин дакьатарра ишлетмиш апIуз мумкинвал тувди», – гъапну региондин кIулиъ айири ва хьадан вахтна Черкес-Озень ва Тарнаирка нирар бегьем марцц апIруваликанра гъулхну.
Сергей Меликовди Владимир Путиндиз аьхю мархьар ургъбан кьяляхъ Дагъустандиъ айи аьгьвалатнакан мялумат дебккну. Урусатдин президент МЧС-дин глава Александр Куренковдин ва ихь региондин кIулиъ айирин докладарихъ хъпехъну.
