Гюлахмад Маллалиев

7-пи апрели Астрахань шагьриъ Н.Крупскаяйин ччвурнахъ хъайи областной библиотекайиъ дагъустан шаир, Урусатдин писателарин союздин член Аьбдуллагь Аьбдурягьмановдин «УкIу булагъар» ччвур тувнайи шиърарин китабдин презентация гъабхьну.

Серенжем Урусатдин писателарин союздин Астрахандиъ айи региондин отделениейи тешкил гъапIнийи. Урус чIалназ му китаб зиихъ къайд дапIнайи отделениейин Литературайин переводдин центриъ лихурайи 21 шаири таржума гъапIну.

Презентацияйин вахтна чпи табасаран шаирин урус чIалназ таржума гъапIу эсерар Юрий Щербаковди, Борис Свер-дловди, Сергей Маслаковскийи, Лилия Вереинайи, Ольга Каргаполовайи, Алексей Казанцевди, Ирина Левитанди, Екатерина Ушенинайи, Николай Загребинди, Олег Талановди, Галина Ефремовайи, Екатерина Четвериковайи ва Лариса Беккери гъурхнийи.

Серенжемдиъ Астрахань областдиъ айи дагъустан культурайин жямяаьтлугъдин председатель Юсуп Мягьямедовра иштирак гъахьну. Аьбдуллагь Аьбдурягьмановди таржумачйириз чухсагъул мялум гъапIну ва уч духьнайидариз табасаран чIалниинди чан сакьюдар шиърар гъурхну.

Аьбдуллагь Аьбдурягьмановдин кьалмиккан гъийин йигъаз табасаран чIалниинди «Арсран гьибар», «Хиялнан акв», «Вахтнан сир», Дагъларин нефес» ва урус чIалниинди «Переливы судьбы», «Улыбка Ангела», «Синие родники» шиърарин гъварчар ккудучIвну. Багарихьди Дагъустандин гьюкуматдин чапханайиъ дугъан сабсан китаб удубчIвиди.