Зубайдат Шябанова
Гьаму йигъари Табасаран райондин Хючна гъулаъ Кьалухъ Мирзайин ччвурнахъ хъайи спортдин дараматдиъ греко-римский жюрейин юкьяр дисбаан ветеранарин арайиъ 4 ражари Урусатдин чемпион ва варихалкьарин дережайин спортдин мастер Эмирбег Мягьямедбеговдин пешкешариз республикайин ММА-йин ачухъ яриш кIули гъубшну.
Талитар Табасаран райондин администрацияйи ва Дагъустан республикайин ММА-йин федерацияйин Женгнан искусствйирин союздин президент Мартин Сефербеговди сатIиди тешкил гъапIнийи.
Турнириъ Дербент, Дагъу-стандин Огни, Буйнагъск шагьрариан ва Дагъустандин кьибла районариан мектебариъ урхурайи 140 живан иштирак гъахьну. Дурар 4 яшнан ва 20 гъагънан категорйириз жара гъапIну.
Талитар лап маракьлудар ва ужуб гьязурлугвал айидар гъахьну. Тамашачйирин арайиъ райондин администрацияйин, Жямяаьтлугъ палатайин, райондин депутатарин собраниейин, акъсакъларин советдин ва жара тешкилатарин вакилар ва кIулиъ айидар, машгьур спортсменар, жямяаьтлугъ касар айи.
Табасаран райондин главайин ччвурнахъан турнир ачмиш апIури, райондин главайин заместитель Рамис Уьсмановди къайд гъапIганси, Эмирбег Мягьямедбеговдин спортдин рякъ республикайин вари жигьил спортсменариз ужуб дарс ва нумуна ву. Дугъан уьмриъ вари а – спортдин рюгьра, маракьлу талитарра, гъалибваларра, спортдин ярхи рякъюн манзилра.
Талитарин тешкилатчи, швнуб-саб ражари ММА-йин талитарин вари дюн’яйин чемпион Мартин Сефербеговди къайд гъапIганси, Эмирбег Мягьямедбеговдин ччвурнахъ республикайин турнир тешкил апIури сабпи раж ву.
«Эмирбег Мягьямедбегов греко-римский жюрейин юкьяр дисбаан ветеранарин арайиъ республикайин кIулиъ айи тажрубалу тренер ва Урусатдин, дюн’яйин, вари халкьарин талитариъ иштирак шулайи Дагъустан республикайин командайин капитан ву. Дугъан ччвурнахъан вуйи турнир учу улихьна йисаритIан тешкил апIуз планламиш дапIнайча. Учу турнир гъабхурайиваликан мялум гъабхьибси, гьадму йигъан йифар дургъну, рякъяр писди айивализ дилигди, райондиз республикайин хайлин шагьрариан ва районариан командйир иштирак хьуз гъафну. Асас вуди Дербент шагьриан ва Буйнагъскдиан вуйи командйири ужудар натижйир улупну.
Буйнагъск шагьрин командайикан жаради пуз ккундузуз. Дурар, республикайиъ наан турнирар гъягъюрашра, 20-30 спортсмен гьаммишан гьязурди гъюри шулу. Мидланра савайи, дурарин гъалибвалик абйир-бабарира аьхю пай кивра. Фици? Мисалназ, талитариз гъягъюрайи командайихъди чпин веледарин тереф уьбхюз дурарин абйир-бабар, гъардшар, эмар гъягъюри шулу. Спортдиъ лазим вуйи алатарихъан, палатдихъан, рякъхъан пул гьяйиф апIудар. Спортдихьна чпин маракьлувал ва гележегдиъ думу машгьур спортсмен шлувалихъ хъугъвал улупури, бицIирин гьевес ва аьшкь за хьуз гъитру. Хъа ухьухь, кьибла Дагъустандиъ, спортдиз гъюз хъюгъю бицIидарихъан юкIв убгрудар гьеле-меле шулдар. Гьаддиз гьаму талитариъра 4 яшнан ва 20 гъагънан категорйириъ аьхюну пай сабпи ва пешкешнан йишвар Дербент ва Буйнагъск шагьрарин командйири гъадагънийи. Сабпи йишвар гъазанмиш гъапIдарин арайиъ Табасаран райондин СиртIич гъулан спортсмен Адам Халикьовра айи. Чан гъулан бализ пешкеш Эмирбег Мягьямедбеговди чав тувнийи.
Му талитариз кьюр судья Кабардино-Балкария республикайиан ва кьюрсана Дербент шагьриан гъафнийи. Дурарин ляхниин вари тренерар разиди гъузну.
Гьарсаб яриш тешкил апIруган, йиз метлеб бицIидариз талитариъ зийнар дархьуб ва судйири гьякьлу баллар дивуб вуйиз. Му талитар узуз ккуниганси кIули гъушну», – гъапнийи Мартин Сефербеговди.
Эмирбег Мягьямедбегов-дин ччвурнахъан ва дугъан пешкешариз вуйи талитар гъюру йисан хьадукра Дербент шагьриъ гъахуз планарик ка.
