Умгьанат Сулейманова
9-пи декабриъ ихь уьлкейиъ Ватандин Игитарин йигъ къайд гъапIну. Му йигъан Москвайиъ, «Гъалибвалин музейиъ», Урусатдин регионариан дуфнайи бицIи игитарин форум кIули гъубшну. Душваъ 23 региондиан 52 — бицIи игитар иштирак гъахьну. Дурарикан 6 бицIир Дагъустандиан вуйи: Расул Гьюсейнов, Мягьямед Гьяжиев, Эмилия Исаева, Азат Фаталиев, Рамазан Багъиров, Мугьяммад Ибрагьимов. Сабвуйи Урусатдин Жигьиларин гвардияйи тешкил гъапIу форумдиъ иштирак шулайи гьарсар игитрин гьунарарикан, шли штукк ккахърайир ккадагънуш, шли цIин ялавлигъян гъядягънуш, кидибтнийи.
Меркездиз теклиф дапIнайидарин арайиъ Дагъустандин Огни шагьриъ 4-пи мектебдиъ урхурайи ихь ватанагьли Расул Гьюсейновра (шиклиъ)айи.
2023-пи йисан 13-пи июндиъ Дагъ.Огни шагьриъ, серфингдин тахтайиин элеъну, гьюлин лепйириин тамшир апIурайи, сар 13 ва тмунур 14 йисан яшариъ айи живанар сабпну гьюликк ккахъуз хъюгъну. Му ляхникан хабар гъабхьи Расул, дишла кюмекназ дажаргъну, штукк ккахърайи кьюрид баярра сагъ-саламатди штуан адагъну. Думуган Расулин мициб дирбаш’валикан саб хайлин махлукьатлу хабрарин дакьатариъ мялуматарра тувнийи. Дугъаз Дагъ. Огни шагьрин администрацияйи ва учв урхурайи 4-пи нумрайин мектебдин администрацияйи чухсагъулин кагъзар тувну.
Гьелбетда, теклиф гъапIу баяр-шубархъди Москвайиз дурарин абйир-бабарра гъушну. Расулин адаш, Аслан Гьюсейновди чпи Москвайиз гъягъбакан гьамци кидибтну.
«1-пи декабриъ Сабвуйи Урусатдин Жигьиларин гвардияйин вакил А.В.Демидовди Москвайиан зенг дапIну, учуз бицIи игитарин форумдиъ иштирак хьуз теклиф гъапIнийи. Ва Расулихъди дина узу гъягъбанди гъахьунза.
Гизаф ужийи кьабул гъапIунчу. Рякъярин, яшамиш шлу йишвхъан тувру, кьюд йигъандин экскурсияйиз вуйи харжар вари тешкилатдин гьисабнаан гъахьну. Ватандин Игитарин йигъаз бахш вуйи мяракара заан дережайиинди гьязур дапIнайи. Думу серенжемдиъ Урусатдин машгьур спортсменар, илимдин ва искусствойин адлу гъуллугъчйирра иштирак гъахьну. Дурарихьан йиз ва йиз хпир Эсмира Гьяжимурадовнайин ччвурнахъ дуфнайи кагъзиъ аьдати хизандин шартIар мюгькамди уьрхбаъ ва бицIидар тербияламиш апIбаъ чешне улупбаз чухсагъул мялум дапIнайи. Расулиз «Гъийин деврин игит» медаль тувну».
Расул Гьюсейнов 2007-пи йисан Табасаран райондит бабкан гъахьну. Думу гьамусяаьтна Дагъ. Огни шагьрин аграрный колледждиъ урхура.
