Мейлан Нежефов

Улихьна йигъари Ургъ’арин администрацияйин глава Тельман Гьюсеев хусуси метлеб айи дявдин операцияйиъ айи юкьур балин адаш , I группайин инвалид Шисин Гьясаналиевдиин улукьнийи.

 

Хуш-беш апIбалан кьяляхъ, чай убгъури, дурари сюгьбат гъубхнийи. Гъулан глава гьаммишан игитарин адашдин сагъламвалин гъаразнаъ а, гьацира дугъу Гьясаналиеварин хизандиз алахьурайи читинвалариз чахьан шлу кюмекар тувра.

«Шисин халу, гьелбетда, юкьур бай дявдиъ айи яв юкIв сефилди айиб агъязуз. Вушра яв кIваз сабур гъадабгъ. Багъри Ватан уьбхбан гъаравлиъ ади, гъалибвал бадали чпин жанарилан хил алдабгъу ихь дагъдин люкьяри – гьюрматлу Русланди, Расимди, Рашидди ва Рамисди улупрайи гьунарар саб мизам терезарихьанра ебцуз даршул. Думу гьаци вуйиб йигъан яв баярин ччвурнахъ гъюрайи медаларина гьюрматнан кагъзари субут апIура. Дурар яв хизандинси, ихь гъулан ва райондин дамагъ ву. Вари ужуйи шлубдиин, дурари жил’ина ислягьвал ва дюзвал хрубдиин ухьу инанмиш вухьа», – гъапнийи Тельман Гьюсеевди.