Зубайдат Шябанова
Гьаму йигъари Табасаран райондин администрацияйиъ муниципалитетдин глава Мягьямед Къурбановди хусуси метлеб айи дявдин операцияйиъ кечмиш гъахьи эскрарин багахьлуйирихьна гьюкуматдин наградйир тувну.
Серенжемдиъ районин депутатарин собраниейин председатель Иса Исаев, райондин главайин заместитель Ринат Мирзабалаев, райондин Жямяаьтлугъ палатайин председатель Аьлимирза Гьясанов, агьли касарин Советдин председатель Къумалат Къумалатов, райондин главайин диндин месэлйириз лигру кюмекчи Надир Зулфикьаров, военкоматдин кIулиъ айи Мурад Мягьямадбегов ва гьацира Хючна, Хюрикк, СиртIич, ГьепIил гъуларин поселенйирин главйир иштирак гъахьну.
ТIивак гъулан вакил рядовой Кирим Аьлиев, ЦIанитIил гъул’ан вуйи сержант Эседулла Къазиев, ТIаттил гъулан вакил рядовой Гьяжи Балабегов, ТинитI гъул’ан вуйи рядовой Илгар Самедов ва ЦIурутIил гъул’ан вуйи рядовой Шакир Аьбдуллаев – игитвалиинди Ватандин хатIасузвал уьбхюрайи вахтна кечмиш гъахьи гьаму эскрар кечмиш хьпан кьяляхъ Кьягьялвалин орденариинди лишанлу гъапIну. Гьацира СиртIич гъул’ан вуйи Гьямзат Къазимягьямадов Жуковдин медализ лайикьлу гъахьну.
Райондин глава Мягьямед Къурбановди ва удучIвну гъулху жара вакилари кечмиш гъахьи эскрарин абйир-бабариз башсагълугъвал ккун апIури, игит баяр тербияламиш апIбаз дурариз чухсагъул мялум гъапIну. Дугъу гьацира райондин агьалйирин юкIвариъ игит эскрарин гьунар уьмурлуг гъубзруваликан ва гележегдиъ дурарин хизанариз улихь дийигъу месэлйир гьял апIбаъ вари терефариан кюмек тувуз гьязур вуйиваликан гъапну.
«Ичв дерд илцифуз шлу гафар адаршул. Ичв баяр, жилар, адашар учуз варидариз дугъри игитвалин нумуна вучуз. Гьюкуматдин гьаму заан наградйир багъиш апIури, ухьу ихь кечмиш гъахьи игитариз уьмурлуг гьюрмат ва дурар гьадрархрувал улупурахьа. Дурари ватандин маракьар уьрхюри чпин жанар фида гъапIу игитвал Табасаран тарихдиъ кьягьялвалин ва намуснан даягъси гьаргандиз гъубзди. Учу ичв дерд гьисс апIурача, ихь игитар кIваинди гъитуз ва дурарин хизанариз кюмек тувуз гьязур вуча», – гъапну Мягьямед Къурбановди, кечмиш гъахьи эскрарин багахьлуйирихьна илтIикIури.
Сюгьбатнаъ Мягьямед Къурба-новди эскрарин абйир-бабарихьан, чахьна вуйи суалар, гьял дапIну ккуни месэлйир аш, гьерхну. Кудуху месэлйир асас вуди кечмиш гъахьи эскрарин багьахьлуйириз тувру пул кьан дапIну гъюрайивалихъди, хусуси метлеб айи дявдин операцияйин иштиракчйирин шиклар кайи баннерар керхбахъди аьлакьалу вуйи.
Мидланра гъайри, СиртIич гъул’ан вуйи Гьямзат Къазимягьямадовдин дада ва чве хусуси тIалаб хьади илтIикIну. Дурари главайикан улихьнаси тикмиш гъапIу цIийи хулариз электричество зигуз кюмек ккун гъапIнийи. Думу месэла гьял апIбан бадали, электричество гъабхру шубуб буруз дивну ва дурарикна симар дизигну ккунду.
Мягьямед Къурбановди му месэла гьадму сяаьт гьял апIуз хъюгъну. Дугъу бурузар чан харжариан гъадагъну, хъа дурар итуз ва тукран симар зигуз Табасаран РЭС-дин кIулиъ айи Багьаудин ТIагьировдиз табшурмиш гъапIну.
