Мейлан Нежефов
13-пи ноябриъ Дагъустандин глава Сергей Меликовди хусуси метлеб айи дявдин операцияйиъ Ватандин улихь эскервалин буржи тамам апIури талаф гъахьи эскрарин абйир-бабарихъди ва багахьлуйирихъди нубатнан пашманвалин гюрюш кIули гъубхнийи.
Мягьячгъалайиъ Дуствалин хулаъ гъабхьи му гюрюшдиъ Хив райондин Мажвгул гъулан агьали Наизат Къалабеговара айи. КIваин апIуз ккундузуз, дугъан бай, прапорщик Гюльмягьямед Къалабегов, Кьягьялвалин ордендин ва жара медаларин ва чухсагъул мялум апIбан кагъзарин сагьиб, 2022-пи йисан 9-пи мартдиъ талаф гъахьнийи. Республикайин кIулиъ айирихъди гъабхьи пашманвалин серенжемдин гьякьнаан йиз Наизат Къалабеговайихъди гафар-чIалар гъахьнийиз.
«Аферин пуз ккундузуз, узухъди меркездиз гъафи ич гъулан кIулиъ айи Агъаверди Жалиловдиз, райондин глава Ярмет Ярметовдиз ва гьацира инсанвалиинди учу кьабул гъапIу республикайин регьбер Сергей Меликовдиз. Узуси кабаб духьнайи абйир-бабар хаблан дапIну, дугъхьан гъюрайи манишнан ялавнакан ва кIваантIан апIурайи дугъан гафарикан ктIарццудайи. Гьич макIан, учвра, бай мицдар дюшюшариъ талаф духьну, дургнайи бейнава вуйиштIан…
Саб гъяриъ айи кIикIларси, сарсарихъ йивури, сар-сарихьан ишлар гъадагъури, гюрюш фици аьхирихъна гъафнушра, хабар гъабхьундариз. Гьамциб йигъан учухъди хъайи дугъан инсансанвализ баракаллагь. Жара ляхин-кар адарди дайки дугъаз, иллагьки гьаму арайиъ. Гьарурихьан жа-жаради рякъюн, штун, газран, аквран, зирзибилин учIруди дийигънайи месэлйирин гьякьнаан гьерхнийи. Йишв’ин думу суалар гьял апIуз гъуларин, районарин ва шагьрарин кIулиъ айидариз бирмиш-буйругъ тувнийи. Мидланра
савайи, республикайин улихь-кIулихь хьайидарин телефнарин нумрар ва адресар кайи дафтрар тувунчухьна.
Учву илтIикIну, «ваъ» гъапи кас гъахьиш, кIулиз адабгъуз даршлу ляхинкар гъабхьиш, ккун апIурза учвкан узухьна илтIикIуб, гъапнийи главайи. Узуз гьамура бес вузуз. Хъа вушра саб тIалаб айиз. Аьгъязуз, дид’инди фукIара бегьем даршлуб, я йиз бай кьяляхъра дяргъруб. Ккун апIураза, йиз гафназ кьувват вуди уву улихь гьучIвну, миди вуйи ихь чвйирчйириканра гьаму ич гъулан кючейиз Гюльмягьямеддин ччвур тувуб ва йиз хуларик думу кIваин уьрхбан мармардашдин гъван кибхуб. Гъит, аргъаж шулайи наслариз игитар ихь арайиъ айиб аьгъю ибшри», – тавакъу гъапIнийи Наизат Къалабеговайи.
Гьаму макьалайиинди Хив райондин администрацияйихьна ва Хив райондин депутатарин Собраниейихьна игитрин дадайин тIалаб тамам апIуз кюмек тувуб ккун апIури, илтIикIураза.
