Наргиз Гюлечова

Урусатдин Президент Владимир Путиндин къарарниинди, 9-пи декабри ихь ватанагьли, Табасаран райондин Куркакк гъул’ан вуйи Аьлибег Асланбеговдиз генерал-майорин звание тувну.

Аьлибег Наврузбегович Асланбегов военный гъуллугънаъ ади хайлин йисар ву. Гъуллугънан рякъ дугъу Орджоникидзейин ччвурнахъ хъайи варитIан заан общевойсковой командирарин училищейик урхуз кучIвбалан ккебгъну. Дугъу гьацира М.В. Фрунзейин ччвурнахъ хъайи общевойсковой академияйиъ урхуб давам гъапIну, хъасин Урусатдин Яракьлу Кьувватарин Генеральный штабдин академия ккудубкIну.

Гизаф йисарин арайиъ Ватан бадали намуслувалиинди гъуллугъ тамам апIбаз лигну, Аьлибег Асланбегов швнуб-саб жюрейин гьюкуматдин наградйириинди лишанлу дапIна. Гьадрарин арайиъ «Гъуллугънаъ гьунарар улупбаз лигну» орден, «Ватандин улихь гьунарар улупбаз лигну» II дережайин ордендин медаль ва гьацира швнуб-саб ведомствойин наградйир а.
Аьлибег Асланбеговди Германияйиъ, Кафари Кавказдин дявдин округдиъ гъуллугъ тамам апIури гъахьну. Гьацира дугъу Чечен республикайиъ гъягъюри гъахьи дявдин гьядисйириъра иштираквал гъапIну, душваъ мотострелковый полкнан командир гъахьну, хъасин шубуд йисан 42-пи мотострелковый дивизияйин командирин заместителди гъилихну. Дидланра савайи, 2008-пи йисан июндин вазлиан 2009-пи йисан октябрин вазлиз 138-пи кIул’инди вуйи гвардяйин мотострелковый Лениндин ччвурнахъ хъайи Краснознаменный бригадайин командир гъахьну.

Гьамусяаьт Аьлибег Асланбегов Кьибла терефнан дявдин округдин 49-пи общевойсковой армияйин командующийдин заместителин гъуллугъ тамам апIури, хусуси метлеб айи дявдин операйияйиъ иштирак шула.