Мейлан Нежефов

Гьаму йигъари Московский областдин Долгопрудный шагьриъ пауэрлифтингдиан Европайин чемпионат кIули гъубшнийи.

 

Тренер хътарди талитарихьна чав кIул’инди гьязур шули, кьюб ражари пауэрлифтингдиан дюн’яйин чемпион духьнайи 23 йисаъ айи ихь ватанагьли Зелимхан Пашаевра му чемпионатдиъ иштирак гъахьнийи.

Хив райондин Хив гъулан агьали Зелимханди дахъну гъагъишин за апIбаан дюн’яйин цIийи рекорд дивну: дугъу ял дарапIди гъагъ за апIру талитнаъ 182 кг, хъа экипировка алдарди дахъну гъагъ за апIбаъ 195 кг за гъапIну. Му хъуркьувалиъ дугъаз кьюбпи ражари пауэрлифтингдиан Европайин чемпион хьузра мумкинвал тувну.
Зелимхан чан юкIв али спортдиан урчIвуб чIатху талитариъ иштирак гъахьну, ва варидариъ дугъу сабпи йишвар гъадагъну.

Гьаму ражарира Зелимханди гъагъ за апIбаан чав варитIан гужлир вуйиб вари аьламдиз cубут гъапIну. Гъит гележегдиъра дугъу ихь халкь адлу апIри.