Наргиз Гюлечова
8-пи августдихъанмина Мягьячгъала ва Каспийск шагьрариъ мобильный интернет либхувал дебккна. Вушра, Мягьячгъалайин саспи йишварихь думу либхура, хъа Каспийск шагьриъ кIуруш, телефондин интернет ишлетмиш апIуз мумкинвал адар.
Мициб аьгьвалат саб Дагъустандиъ ваъ, хъа Урусатдин хайлин регионариъра арайиз дуфна. Мобильный интернет либхуб дебккнайиваликан ухьуз зарар адрувалин, думу ляхин янаки агьалйирин хатIасузвал уьбхюз кIури, апIурайибдин вари гъаври а, вушра, гъийин девриъ ухьу хайлин ляхнар интернетдин кюмекниинди апIурайивализ лигну, саб жара читинвалар арайиз гъюра.
Му аьгьвалатнан гьякьнаан республикайин агьалйирин фикир фициб вуш ахтармиш гъапIунза.
Дербент шагьриан вуйи ихь ватанагьли Марат Керимовдин гафариинди, Кьибла Дагъустандиъ мобильный интернетдихъди аьлакьалу вуйи читинвалар адар. Вушра, саспиган дилибхрайи йигъарра алахьури шулу.
Каспийск шагьур мисал вуди гъадабгъиш, мушваъ затра интернетдин аьлакьа адар.
Инсанар шагьриъ айи агьвалатнаккан аьсси духьнашра, интернет хъябкьнайивал агьалйирин хатIасузвал уьюрхуз апIурайи ляхин вуйибдин дурар гъаври а.
Алверчи Патимат Сиражутдиновайин гафариинди, гьамусяаьт инсанари чпихь жвилли ляхнариз пул гъибтри имдар. Мутму масу гъадабгъиган, телефондиан пул хътапIувалихъди вердиш духьна.
«Интернет адрувализ лигну, му ляхин, мутму масу гъадабгъруризси, учузра артухъси читин гъабхьну. Картайихъан пул хътабгъбан бадали, банкоматар хьайи йишварихьна душну ккунду, хъа гьяйифки, Каспийск шагьриъ банкоматар гизаф йишварихь хьадар», – кIура дишагьлийи.
Дагъустандин цифровой министерствойиан тувнайи мялуматариинди, мобильный интернетдихъди вуйи аьгьвалат гьелелиг дигиш апIуз планариъ адар, фицики дидин ляхин хусуси метлеб айи дявдин операция гъябгъюри имиди, уьлкейин агьалйирин хатIасузвал уьбхбан бадали, дебккнайиб ву. Гъийин йигъан завлан тIирхру алатарихьан инсанариз аьхю хатIа хьуб мумкин ву.
«Интернет лазим вуйи саягъниинди либхури адаршра, телефнариъ айи саспи приложенйир саб читинвалра адарди лихура. Мисал вуди «Госуслуги» приложение гъадабгъиш, ВПН кабхьну адаршра, душваъ учIвну, гъуллугъ гьубкIуз шулу. Хъа таксийиз дих апIбан аьгьвалат дигиш апIбан бадали, учу бизнесменарихьна илтIикIну, чпин магазнариъ вая жара йишвариъ дивнайи Wi-Fi-диин али «ачар» вариди сабсиб дапIну, рягьятди алдабхърубси апIуб ккун гъапIнийча. Ич тIалабниин дурар рази гъахьну.
Мидланра савайи, учу Мягьячгъалана Каспийск шагьрарин жямяаьтлугъ йишварихь пулсузди вуйи Wi-Fi дивунча», – хабар тувра министерствойиан.
Мобильный интернетдин ляхин дебккували бизнес сирниккан ккадабгъбазра аьхю кюмек тувра. Гьаз гъапиш алвер апIурайи касари чпин магазнариъ, кафйир-ресторанариъ карточкайихъанди пул тувуз шлу банкдин аппаратар дивуз хъюгъна. Гьадму аппаратар дивбиинди гъюрайи гъазанжра ашкар ва туврайи налогарин кьадар хайлин артухъ шула.
