Наргиз Гюлечова

25-пи сентябриан 28-пи сентябризкьан Мягьячгъалайиъ Пушкиндинна СтIал Сулеймандин ччвурнахъ вуйи кючйириъ «Ирс уьбхюрайидар» кIуру ччвур тувнайи халкьарин художествойин сяняаьткарваларин (НХП) фестиваль кIули гъябгъиди. Думу фестиваль вари халкьарин арайиъ тешкил дапIнайиб ву кIури, республикайин туризмйинна НХП-йин министерствойиан мялумат тувна.

 

Министерствойиан вуйи хабриинди, гьаму йигъарин арайиъ кIули гъябгъру фестивалин дахилнаъди Урусатдин регионарианси, гъунши гьюкуматарианра, гьадму гьисабнаъди Беларусдиан, Узбекистандиан ва Киргизияйиан 100-тIан артухъ устадари чпин сяняаьткарваларин аьнтикьа шей’ар улупру выставкара планламиш дапIна. Выставкайиъ Оренбургдиан хьайин шалар ва ягълухъар, Тулайин самоварарна пряникар, дагъустандин халкьарин сяняаьткарваларин шей’ар, гьадму гьисабнаъди табасаранарин халачйир ва хъанара жара аднан сурсатар хьиди.

Мидланра гъайри, фестивалиъ гъябгъюрайи йигъари мина гъафи касариз тажруба айи устадари халкьарин сяняаьткарваларин шей’ар фици апIрудар вуш, мастер-классарра улупиди.

Къайд дапIну ккундуки, «Ирс уьбхюрайидар» фестиваль гьар йисан гъябгъюрайиб ву. Гъачай, иштирак йихьай!