Мейлан Нежефов
Гьаму йигъари Мягьячгъала шагьриъ Къумукъ театрин дараматариъ Дагъустандиан СВО-йиз душнайи журналистари «Жвувандарихъанди! Ихьдар ккатIахьидархьа! Гьякьлувалихъанди! Гъалибвалихъанди!» лишниккди дюзмиш дапIнайи документальный фильмдин презентация гъабхьнийи.
Фильмдин эвелиъ уьмрин юлдшар вуйи ихь ватанагьлийир, Мавзудин ва Радмила Аьбдуллаеварикан (шиклиъ) ихтилат гъябгъюра. Дурарин хизан Хив райондин ГъуштIил гъул’ан ву.
СВО-йиъ сабпи йигъланмина иштирак шулайи, Луганск Халкьдин Республикайин сабуну дявдин штабдин начальник, капитан Мавзудиндин теклифниинди гъи Радмилара ихь эскрариз мани хураг гьязур апIру гъу-ллугънаъ лихура.
«Ватандин Аьхю дявдин йисари ихь дадйири, чйири дяхнин кIулар уч апIури, атIнар-гапар, бегьлийир, жигтар урхури, гъалибвал гъадабгъбак аьхю пай кивну. Гъи мушваъ гъягъюрайи дявдин гьяракатарик йиз юлдшихъди жвуванра хусуси пай киврайивалиин швумал дарза», – кIура Радмилайи.
Дугъу кми-кмиди ихь баяриз табасаран халкьдин халис хурагар апIура.
«ЦIикбар (гюмбйир) ва чIилли хинкIар гъапIган, узуз ихь баяри «Чухсагъул, дада!» кIури шулу. Гьаму гафнаъ аьхю мяна а. Дурариз му хурагарихъан жвуван багъридарин ниъ, Ватандин дад ва тIяаьм гъюрайиб гьисс апIураза. Гьаддиз дурариз дадавалин манишнан гьиссар тувуз ва ихь гъалибвалик жвуванра пай кивуз чалишмиш шулаза», – къайд апIура Радмилайи.
Радмилайи, дагъустанлуйирихьна илтIикIну, дурари хътапIурайи гуманитарный гъагъназ гьаруриз жа-жаради чухсагъул мялум апIура.
«Гъюрматлу дагъустанлуйир! Учву хътапIурайи нази-ниъмат вахт-вахтниинди рубкьурачухьна. Аферин!
Гьацира, чухсагъул мялум апIуз ккундузуз фондариан ва йиз ччвурнахъ хъайи карточкайиина хътапIурайи пулин дакьатаризра. Думу гьаму-шваъ, туканариан лазим вуйиб гъадабгъури, харж апIураза. Хайлин кюмек шула, валлагь. Ухьухь кIури шулу: «Илдипнайи садакьа абхъру йишвакк ккудубкьру гъусисиб мутму ву», кIури. Аллагьди гъядапIру агьларикан даришричву. Ичв веледарин улихь дугъуб-жври ва гъазанмиш апIру жандиз мюгькам сагъ’вал туври.
Учву кюмекнан хил гьачIаб-ккурайивали гьамушваъ ич хил фукьан вушра мюгькам апIура ва ихь эскрарин гьевес ва гъалиб хьпан кьаст ижми апIура. Ва ихь фагьум-фикир саб вуйиб, дявдин хабар-этер вари хулариъ убчIвнайиб гьамдиан субут шули а. Гъит дидин гъамлу йигъарин аьхир ибшри, ва гъалибвал ихь терефназди хьуб ккун апIураза», –чан фикрар аьхю разивалиинди ачмиш гъапIнийи Радмилайи.
