Умгьанат Сулейманова
Улихьна йигъари Дербент шагьриъ ерлешмиш дубхьнайи Рукьан рякъюн колледждин 120 йисандин юбилей къайд гъапIну. Му шадлугънан серенжемдиъ Дербент шагьрин администрацияйин гъуллугъчйир ва жара тешкилатарин вакилар иштирак гъахьнийи.

 

Рукьан рякъюн урхбан заведение 1903-пи йисан дивуб ву. Хъа 1928-пи йисан фабрикайинна заводдин мектеб цIийи саягъ тешкил гъапIну. Рукьан рякъюн колледж ачмиш гъапIу йигъланмина, 21 агъзур студентар му гележег хъайи пишейин эйсйир гъахьну. Дурарикан аьхюну пай ихь аьхю уьлкейин жюрбежюр шагьрариъ ва областариъ тялукь ляхнариъ лихура.

Рукьан рякъюн колледждин директор Мирсамед Сеидовди чпи гьязур гъапIу пишекрарикан гьамци гъапнийи: «Ич колледж ккудубкIу студентар, жюрбежюр шагьрариъ, мисалназ, Череповец, Ярославль, Батайск, Ростов, Нижний Новгород, Тихорецк, Краснодар ва гь.ж. ляхнихъди тямин апIурача. Гъюру 2024-пи йисан Москва, Санкт-Петербург ва имбу аьхю шагьрарихъдира ич студентар ляхниз кьабул апIбаан йикьрар йитIуз мясляаьт дапIнача.

Учу гьязур гъапIну студентарин ляхниз ужуб кьимат туври ва колледждин коллективдиз чухсагъул мялум апIури, кми-кмиди кагъзар гъадагъурача. Гъи ич колледждиъ 630 студент урхура, дурарикан аьхюну пай табасаранар ва азербайжанар ву, имбудар лезгйир, аварар, даргйир, сакьюдар студентар жара милетарин вакилар ву. Якьинди пуз шулузхьна, ихь Дагъустандиъ сарун мициб колледж адар».