Гюльнара Мягьямедова
Табасаран дишагьлийир сабанра ляхин дарди, униъ хилар ивну, дусну гъузрудар дар. Улихьдин вахтари дурариз затра ккудудубкIру ляхин – халачйир урхувал айи. Саб халачи дубхну ккудубкIну, сад-кьюд йигълан цIийи халачи рибшуйи. Хъа ихь халачйирин фабрикйир хъяркьбахъди аьлакьалу вуди, гизаф дишагьлийир ляхнихъ мягьрум гъахьнийи.
Дидхъанмина заманара дигиш гъабхьну, дишагьлийирин гъайгъушнарра. Шли-вуш гьамусдин дишагьлийир темпел духьна пиди. Хъа узхьан дидихъди рази хьуз шулдар – темпел инсанар гьадму вахтнаъра айи, гьамусра дурарин кьадар цIиб дар. Гъийин деврин бязи дишагьлийир лапра дирбашдар ву. Дурар бицIидар уьрхюри декретдиъ айиганкьан сикинди гъузрадар. Хизандин бюджетдик лайикьлу пай кивуз чарйир апIури, хул’ан лихури (дистанционно), гъазанж гъадабгъуз жюрбежюр ляхнар агура. Гьацдарикан сар Ростов обдастдиъ яшамиш шулайи ихь ватанагьли Карина Зугьрабова (шиклиъ) ву. Дугъу шоколаддикан ва зефирикан кюкйирин кунцIар апIури, дурар масу тувра ва гьацдар кунцIар апIуз юкIв хъайи жара шубаризра аьгъювалар тувра. Му шуран ляхниин гьяйран духьнайи узу дугъахъди телефондиан сюгьбат гъубхунза.
– Карина, шоколаддин кюкйирин кунцIар апIбахьна фици гъафунва? Даршиш уву бицIи вахтнахъанмина меълишнариин юкIв алир, дурар гьязур апIуз ккунир вуйва?
– БицIи вахтнахъанмина меълишнарихъди ляхин апIуз ккунир вуйза пуз шулдарзухьан, думу ляхнихъ узу йиз кьисматну, яшайишдиз пулин дакьатар лазим вуйивали хъаъну. Узу, хилариин бицIи байра алди, жилирихьан жара гъахьнийза. Мялум вуйиси, бицIир уьрхювал рягьят ляхин дар. Дугъаз гъягъру харжарра бицIидар дар, гъюру пособиейихъ яшамиш хьуз узуз ккундайзуз.
БицIир хулаъ дитну ляхниъ учIвузра шулдайи. Узу хулаъ имиди гъазанж гъюру ляхнарикан фикир апIури гъахьнийза.
Сифте дишагьлийирин улариин писписар илитIуз дубгъуз хайлин харжар гъапIнийза, хъа думу ляхнихъ йиз юкIв хъадайиз. Интернетдиъ хайлин жара ляхнар агурайи вахтна, шоколаддихъди ляхин апIуз дубгъуз ккун гъабхьнийиз. Учу гъулаъ яшамиш шулача, мушваъ кюкйирин кунцIар, жюрбежюр пешкешар масу тувру йишв адайи. Гьаддиз узу шоколаддихъди ляхин апIуз хъюгънийза. Думу ляхин узуз улупрурра адайи. Жвуван гъалатIар дюз апIури, лихури гъахьунза. Сабпи гамар читиндар вушра, ляхин дишлади гьяракатнаъ убчIвнийи. Гъунши гъуларианра кмиди заказар гъюз хъюгънийзуз.
Ляхин улихь гъябгъюз хъюбгъиган, инстаграмдиъ йиз маш ачмиш гъапIза. Дишлади шоколаддин кюкйир кьабул вуйи инсанари узуз бикIуз хъюгънийи. Сар шуру узкан шоколаддихъди ляхин апIуз чазра улупувал ккун гъапIган, мюгьталра гъахьнийза, хъа гьаци гъазанмиш апIуз шлувалиинра фикир апIуз хъюгънийза. Узу фици шоколаддихъди ляхин апIуруш улупру дарсар видеойиз адагъну, сарпи ученикар гъадагъуз хъюгънийза. Пуз ккундузузки, гъийин йигъаз 1000-рилан зиина шубариз дарсар тувну, шоколаддихъди ляхин апIуз улупунза. Дурари чпин хъуркьуваларикан узуз ктибтура, дурари вазлин арайиъ сумчIурилан варж агъзур манатдиина гъазанмиш апIура. Гизафдариз гьаму ляхин кьабул хьувалин себеб – хулан айитI дусну апIуз хьувал, шоколаддихъди ляхин апIбаз гизаф вахт харж даршлувал, гьюкуматдин ляхнинси вахт дебккну адрувал ву. Узу гьаддиин гизаф рази вуза.
Йиз хъуркьуваларикан улхуруш, бицIи байра уьрхюри, гьар йигъандин харжар ктарди, узхьан машин гъадабгъузра, хъана хизандин хайлин жара ляхнаризра пул гъазанмиш апIуз гъабхьунзухьан. Инстаграмдиъ узу апIурайи ляхниз кьимат диври, 30 агъзурилан зиина инсанар а. Гьаму ляхни узук гьевес капIну.
– Уву, шоколаддинси, зефирин кюкйирра апIуз хъюгъюнва. Дидкан фу пуз шулвухьан?
– Ав, улихьнаси узу зефирихъдира ляхин апIуз хъюгъюнза. Хьадан вахтна манишнаан шоколад ебцIуру, мидланра савайи, шоколаддин кьиматра за дубхьна. Хизандин бюджет кьитди вуйидариз зефирин кюкйир ужузди удучIвуру. Дупну ккундуки, кюкйир апIуз шлу зефир гьязур апIури, гизаф зегьмет гъизигунза. Аьхирки узуз кьабул вуйибсиб рецепт адабгъунза. Зефир гьязур апIбан дарсарра тувуз хъюгъюнза.
Узу дарсар туву, узуси хулаъ гъазанмиш апIурайидар йиз ляхникан гизаф шад ву, гьар йигъан чухсагъулин гафар хътаура.
Пешкешди туву меъли кюкйирин кунцIар, жвуван багахьлуйирихъди дусну, итIуз шулу. Гьарсаб дициб кунцI гьязур гъапIу автори дидик чан кIван ккунивалин пай кивна. Гьаддиз дурар гизаф иццидар, жара йишвариъ масу гъадагъуз даршлудар шулу.
– Карина, уьмрин читинвалар алахьнайидариз, бицIирихъди хулаъ дусну гъазанмиш апIуз ккуни жигьилариз фициб насигьят тувуз шулвухьан?
– Жигьилариз пуз ккундузуз, саб вахтнара пашманвалиъ кIул ипну мудусанай. Гъийин девир социальный сетарин девир ву. Гъазанмиш апIуз ккунидариз гизаф мумкинвалар а. Ичв юкIв зигру ляхин абгай, соцсетариъ страничка ачмиш апIинай. Нач’вал ярхла дапIну, ляхин апIуз хъюгъяй.
Дугъриданна, Каринайиси интернетдиъ ляхин апIурайидарин кьадар аьхюб ву. Дурари чпин ляхнин график, вахт чпи дебккра. Гъазанжра харжиб дар.
