Табасаран райондин Цалак гъулаъ бабкан гъахьи Айназ Аьзизова Украинайиъ кIули гъябгъюрайи хусуси метлеб айи операцияйиъ иштирак шула. Думу, гъагъи зийнар духьнайи ихь эскрар сагъ апIури, военный госпиталиъ медсестради зегьмет зигура.
«2022-пи йисан 23-пи февралиъ хябяхъдин вахтна вари коллективдихъди Ватан уьбхрюрин йигъ къайд апIури гъахьунча. Военный частнан командир дуфну, лап пашманди ич гъвалахъинди деу. «Ухьу закур гвачIнинган Крымдин ва Украинайин сяргьятарихъна гъягъюрхьа. Гьелелиг ичв хизанариз, абйир-бабариз пуб лазим дар», – мялум гъапIнийи дугъу. Гьамци, 24-пи февралиъ гвачIнинган гьязур духьну, рякъюъ учIвча. ГьапIру сяргьятарихъ дугъужвуб, 25-пи февралиъ Украинайин айитI учIвунча. Гьамци Донецкдиз адахъунчу. Фу лигурва, хъайигъан гвачIнинган госпитализ десте-дестеди зийнар духьнайи эскрар хуз хъюгъну. Дишла хилар хъержвну, эскрариз учхьан шлу кюмек апIуз хъюгъюнча», – ктибтнийи ич журналистдиз Айназ Аьзизовайи.
ВаритIан читинуб Айназдиз апрелин ваз гъабхьну. Юкьуд йигъандин арайиъ дугъу чан гъарашугъарихъди читин зийнар духьнайи эскрарин кIул’инди 40-кьан операцйир гъапIну, хъа операцйир апIру медицинайин бригадайин дахилнаъди 300-тIан зина операцйириъ иштирак гъахьну.
Айназ Аьзизова хайлин гьюрматнан грамотйириинди лишанлу дапIна. Дугъаз «Дирбаш’вал улупбаз лигну» медалра тувну.