Табасаран райондин ЧIвурдаф гъул’ан вуйи, гьамусяаьт Мягьячгъалайиъ яшамиш шулайи Фатима Султановайи 7 йисандин арайиъ 425 дагъустанлу чпиин али буржи тамам апIуз гирами ругариина гьаъну. Гьар вазли Фатима Султановайи, мумкинвалар айи инсанар проектдиз жалб апIури, касибвал кайи, дарвалин шараитариъ айи динагьлийириз Уьмра-гьяждиз гъягъюз кьюб-шубуб путевка тувра.
Фатимайи мялум гъапIганси, «Уьмра-гьяж» эвелиан проект вуди ккебгъуб дайи. 2016-пи йисан думу, жюрбежюр социальный сетариъ айи касариз макьалйир дикIури, гизаф инсанарихъди таниш гъахьнийи. Ва гьадму йисан аьхириъ, Дагъустандиъси, Урусатдиъра гизаф подписчикар айи касари чпин социальный сетарин машариъ конкурсар гъахурайиб гъябкъган, Фатимайизра, чан подписчикарин арайиъ конкурс дубхну, сар кас гьяждиз гьауз ккун гъабхьнийи ва, конкурс гъабхбан бадали, путевка гъадабгъуз кюмек ккун апIури, танишдарихьна илтIикIнийи. Саб кьадар жумарт касари пул кивну, 40 агъзур инсандин арайиъ конкурс гъубхнийи. Гьаддин кьяляхъ, инсанарин тIалабариинди, дугъу думу конкурс гъабхувал аьдатнаъ ипнийи, ва натижайиъ проект арайиз гъафнийи.