28-29-пи октябриъ, кьюд йигъандин арайиъ Каспийск шагьриъ, республикайин Правительствойин Хабаровский крайдиъ айи вакил Бейдулагь Исаевди тешкил дапIнайи, спортдинна ватанпервервалин аьхю серенжем – Урусатдин Федерацияйин ва Луганск Халкьдин Республикайин Игит, генерал-лейтенант Эседуллагь Абачевдиз бахш дапIнайи, хилариинди кчIихбаан Дагъустандин чемпионат кIули гъубшну. Думу талитариъ республикайин шагьрариан ва районариан 300 спортсмен иштирак гъахьнийи.
Талитар гъахбан асас метлебар уьлкейин президентдин политикайин тереф бисуб ва хусуси метлеб айи дявдин оперцияйиъ иштирак шулайидар гьевеслу апIуб, жигьил насил сагъу уьмрихьна жалб апIуб ва дурариз ватанпервервалин тербия тувуб, хъа гьацира ихь машгьур ватанагьли генерал-лейтенант Эседуллагь Абачевдин ад вари халкьарин арайиъ тарабгъуб, ихь миллетдин халис мургарикан имбударизра хабар тувуб вуйи.
2024-пи йисан му талитар Луганск Халкьдин Республикайин аьтрафариин Урусатдин чемпионатси кIули гъахуз планариъ а.