Гюльнара Мягьямедова

Дагъустандин Глава Сергей Меликовдин ччвурнахъна хусуси метлеб айи дявдин операцияйин иштиракчи Расим Гьяжиагъаевди гъуллугъ апIурайи частнан командирин терефнаан чухсагъул мялум апIурайи кагъаз гъафну. Республикайин главайин мялуматарин гъуллугънаан гъафи хабриинди, кагъзиъ Гьяжиагъаевди гъуллугънан вазифйир тамам апIруган улупу дугъан игитваликан, кьягьялваликан дупна.

 

«Учу Р. Гьяжиагъаевдин дирбаш ва намуслу зегьметназ, дугъан аьхю жавабдарвализ заан кьимат туврача. Дугъан гъуллугънахьна вуйи рафтар заан кьимат тувувализ лайикь ву. Расим Гьяжиагъаевдин кьягьялвал ва кIубанвал имбу эскрариз чешне шул кIури, умудлу вуза», – дупна кагъзиъ.

КIваина хурача, Хив райондин Ургъа гъулан вакил, РД-йин Халкьдин Собраниейин депутат, образованиейин ва илимдин комитетдин член Расим Гьяжиагъаев 2022-пи йисан хусуси метлеб айи дявдин операция гъабхурайи йишваз гъушнийи. Дидиз улихьна депутат хусуси метлеб айи дявдин операция гъабхурайи йишваз рягьимлувалин кюмек хьади гъушнийи. Расим Гьяжиагъаевди, ДНР-ин ва ЛНР-ин агьалйир Урусатдин эскрарин кюмекназ ккилигурайиб гъябкъиган, хусуси метлеб айи дявдин операцияйиз гъягъюз йикьрар гъапIнийи.

Гъубшу йисан Сергей Меликовди Расим Гьяжиагъаев, жигьилариз ватанпервервалин тербия тувбак киву пайназ лигну, Амет-Хан Султандин ччвурнахъ хъайи медалиинди лишанлу гъапIнийи.