Наргиз Гюлечова

Гьаму йигъари Москвайиъ «Урусатдин тарихнан жямяаьтлугъ» тешкилатдин хулаъ аргъаж шулайи насларихъди ляхин апIурайи краеведарин вари халкьарин арайиъ конкурсдиъ гъалиб гъахьидариз пешкешар тувбан серенжем кIули гъубшну.

Конкурсдин пешкешнан йишвар гъадагъдарин арайиъ Табасаран райондин Дарвагъ гъулан 1-пи нумрайин мектебдиъ тарихнан дарс киврайи Нурлан Исмяиловра а. Дугъу 2-пи йишв гъадабгъну.

Нурлан Исмяиловди конкурсдиз гьязур гъапIу «Жигьиларин арайиъ Дагъустандин культурайин ирснан объектарикан яркьуди аьгъювалар тарагъуб» проектдиз жюрийи заан кьимат дивну.

Аргъаж шулайи насларихъди ляхин апIурайи краеведарин вари халкьарин арайиъ кIули гъубшу конкурсдиз Урусатдин 84 региондиан ва харижи уьлкйириан 598 проектар хътаъну. Гьадрарикан 22 региондиан вуйи 26 иштиракчитIан финализ удучIвундар. Финалиъ 2-пи йишван сагъиб гъахьир ихь ватанагьли ву. Гъалибчйириз пешкешар «Урусатдин тарихнан жямяаьтлугъ» тешкилатдин правлениейин председатель Руслан Гагкуевди тувну.

«Табасарандин нурар» газатдин терефнаанра Нурлан Исмяилов конкурсдиъ 2-пи йишв гъазанмиш апIбахъди тебрик апIурача. Гъит ихь бажаранлу мялимдиз хъанара артухъ хъуркьувалар ишри.