Гюльнара Мягьямедова
Сентябрин 18-пи йигъан Дагъустандин Глава Сергей Меликовди дявдин гъуллугънахъди аьлакьалу серенжемар гъахбан месэлйириз лигру гьяракатнан штабдин заседание гъубхну.
Заседаниейиъ чвлин призывдиз гьязур хьувалин ва ватандашар дявдин гъуллугъназ гъягъбан гьякьнаан контрактар йитIбиина жалб апIбан месэлйир гьял гъапIнийи.
Чан улхбаъ Сергей Меликовди зиихъ ктуху месэлйирин гьякьнаан хатIасузвалин Советди гъабхурайи ляхниз, хьадукран призывдин кампанияйин натижйириз ужуб кьимат тувнийи. Гьаддихъди сабси, бязи муниципалитетариъ думу ляхин гъизгъин дапIну ккуниваликанра гъапнийи.
Ватандашар Урусатдин яракьлу кьуватарин жергйириз контрактдиинди дявдин гъуллугъниина жалб апIбан гьякьнаан РД-йин ХатIасузвалин советдин секретарь Мягьямед Баачилов удучIвну гъулхнийи. «Агьалйирин арайиъ контрактдиинди гъуллугъ апIуз гъягъбан гъаврикк ккаъбан ляхин давам шула. Гъийин йигъаз республикайин саки вари муниципалитетариъ районарин ва шагьрарин военный комиссарар, гъуларин главйир, военкоматариъ лихурайи гъуллугъчйир иштирак вуйи совещанйир духна», -къайд гъапIну ХатIасузвалин советдин секретари.
Урусатдин Яракьлу кьуватарин дахилназ ватандашар контрактдиинди жалб апIбан ляхникан Мягьячгъалайиъ контрактдиинди ватандашар гъядягъру пунктнан начальник Алексей Ивановди ктибтну. «Контрактдиинди дявдин гъуллугъназ гъягъюрайи кас, аьрза дибикIну шубуд йигъандин арайиъ чав гъуллугъ гъабхру йишв’ина гьаъбан серенжемар кьабул дапIна. Ватандашар контрактдиинди дявдин гъуллугъназ гъядягъру пункт материаларихъдина техникайихъди тямин дапIну ккудубкIну», — гъапну дугъу.
Дагъустандин военный комиссар Даитбег Мустафаевди чвлин призыв ккебгъайиз военный комиссариатариъ призывдин ва медицинайин комиссйири гьязурлугвалин ляхин гъабхурайиваликан гъапнийи. «Казармйир, жара субъектариан гъюрударизра кади, гьязур дапIна. Гъюру гьяфтайиъ муниципалитетарин призывдин комиссйирин председателарихъди, шагьрарин ва районарин военный комиссараихъди, ватандашар дявдин гъуллугънан призывдихьна гьязур апIбан отделенйирин начальникарихъди табшуругъар тувбан ва методикайин сборар планламиш дапIна.
Заседаниейин аьхириъ Сергей Меликовди асас гъуллугъарин кIулиъ айидариз табшуругъар тувнийи.
