Мейлан Нежефов
Гьаму йигъари Урусатдин яракьлу кьувватари Украинайиъ гъабхурайи хусуси метлеб айи операцияйиъ, жюрэтлувал улупурайи ва гъалибвал багахь апIбак чан хусуси пай киврайи ихь ватанагьли Аьгьмад Аьлиев Суворовдин медалиинди лишанлу гъапIну.
ЙицIихьуд йигъандин отпускдиз дуфнайи Аьгьмаддихъди ич газатдин хусуси мухбир Мейлан Нежефов гюрюшмиш гъахьнийи. Дурарин арайиъ гъабхьи сюгьбат исихъ жикъиди чап апIурача.
– Аьгьмад, газат урхру ихь ватанагьлийириз жикъиди яв уьмрикан ктибтнийиш, ккундийзуз.
– Узу 1996-пи йисан 24-пи декабриъ Хив райондиъ Асккан Яракк гъулаъ Гъурбан ва Рукьижат Аьлиеварин хизандиъ бабкан гъахьунзу. Ич хьур велед айи хизандиъ узу варитIан бицIинур вуза. ИкибаштIан, вари гъулан баярси, узура, багъри гъулан мектебдиз гъягъюри, хулаъ айи аьхюр-бицIириз бакар шули ва мал-къарайин гъайгъушнаъ ади аргъаж гъахьунзу. 2015-пи йисан Ватанди йиз гъюнариин илипнайи эскервалин буржи Челябинск шагьриъ хушниинди кIулиз адабгъну, 2016-пи йисан военный контракт гъийибтIунза. Гьамци, узу му рякъ йиз аьшкьниинди ктабгъбиин гъи саб жизбикьан швумал дарза. Ва гьамусра уьлкейиз вафалувалиинди гъуллугъ апIбаз хъана гаф тувраза.
– Яв хасиятнан ватанпервервалин рюгьназ чухсагъул, Аьгьмад. Уву филандихъамина СВО-йиъ иштирак шули ава?
– Ихь ватанагьлийир гизаф айивализ лигну, 2019-пи йисан узура Чечендиз гьауб тIалаб гъапIнийза. Ав, гъи му республикайин ччвур жюрэтлувал улупурайи эскрариинди варидарин мелзниин ал. «Ахмат» батальондиъ, дугъриданра, ихь дагъустанлуйир гизаф а. Хъа дурарин арайиъ айи табасаранлуйирикан улхурира дарза. Меркез ву сарун, СВО-йин иштиракчйирин меркез! Узу хусуси метлеб айи дявдин операцияйиъ, думу ккебгъу сабпи йигъланмина иштирак шулаза. Йиз ва узухъди хъайи ярар-дустари, саб лик ухьу улихь духьну, му дявдин цIа ихь гъийин душмнин аьтрафариин хьуб хуб ужуйи гъабхьну, кIурача. Ав, гъи гьарсаб хизан-кюлфетдиан са-сар, кью-кьюр тушваъ а, хъа шлиз аьгъяйи, эгер вахтниинди ухьу уягъ гъахьундайиш, гъи ихь юрдарин гьял фициб дубхьнайш… Шюкюр ибшри Худайиз.
– ИпIру-убхърубдихъди, палатдихъди ва яракьдихъди фици вучва?
– Гьелбетда, дявдин цIин майдандиъ вари хъайи-хъайибси даршул. Хъа вушра, ккебгъу ва гьамусдин вахтарин аьгьвалат чиб-чпихь тевиган, ужуб терефнахъинди дигиш’валар а. Думуган читинди вуйи. Гьюкуматдиан имид ибшри, хътапIурайи гуманитарный гъагъкьан бегьемди ихь эскрарихьна рубкьурдайи. Узуз гьаддиин ул ва хил иливну гъахьи гьярамзадйириз пуз рубкьру гаф пуз бихъурадарзуз. Мидланра савайи, СВО-йиъ айидариз гьар вазли флану кьадар маважиб тувра, ужудар льготарра а, кIуру гафар-чIалар, гъеерхьиган, хъугъ, жандилан зиз гъябгъюри, кIулин чIарар за шуйи, ва гьамушваъ айи аьгьвалатнан ялавнутIан, гьадму гъирагъ-бужагъдилан куркIрайи мицдар гафари хъана учIвру апIуйчуз. КIваан хиял гъябгъюйи – мина фуж ва фу бадали дуфнайир вува, бейнава? Техникайин ва яракьдин гьякьнаанра гьаци кьитвал ади гъабхьнийи. Хъа гьамус, фукIара дар, техника ва яракьар гьуркIну шула. Гьаци ву алабхьру-илдибтрубдин ва ипIру-убхърубдин гвачIин-хябяхъра. Инсанарин учухьна вуйи лигубра жараб дубхьна, учу гъабхурайи женгарин метлебнан дюзди гъавриъ ахъна. Гьамус эскрарихьна варидарихьна багъридарихьнаси лигури, дурариз хайлин кюмекар тувра, ва вахтниинди думу гуманитарный гъагъра рубкьурачухьна. Аферин! Мектебариъ урхурайи бицIи малайикарира ихь асланариин хъугъвал алди, дурарик миж кади, кагъзарик чпин фагьмар-фикрар ашкар апIурайивал гъябкъиган, ихь баяри, айибтIан артухъ рюгьламиш шули, гьунарар улупура.
– Женгариъ гизафси фти ва шли кьувват туври авуз?
– Саб гъапиб, жвуван хизанди. Узухъди му женгариъ йиз кьюр гъахи чвйир, Муфрудин ва Муслим, иштирак шула. АлтIабгнайи завун кIанакк, жил’ин мясляаьтвал алди, закурин йигъ акуди лицуз ккунди айи дадайин, уьмрин юлдаш Дианайин ва риш Асияйин халис ватанпервервалин хиялари ва фикрари кьувват тувразуз. Кьюб гъапиб, улихь-кIулихь хьайидарра хъади, саки вари кьягьяларин мурад-метлеб гъаних душмниин гъалиб хьуз ният ади гюллдихь мухур гьивну жан фида апIурайивали.
– Ихь сюгьбатнан аьхириъ, ватанагьалйирихьна илтIикIури, фу пуз ккундувуз?
– Ватанагьлийирикан сифтена-сифте ккун апIураза интернетдиъ ккабхъу сайтариан мялуматар гъададагъуб. Душв’ан фу вушра мялум дару ва сар шли-вуш монтаж дапIнайи кучIлин хабрар-этерар гъадагъури, мина-тина хътаури, дявдиъ айи жигьиларин абйир-бабарин, чвйир-чйирин юкIвар имбубтIан сефил дарапIуб. Хъугъай, учу, гьякь’вал йишв’ина хру женгнаъ гъалиб хьуз вари чарйир зигури, жвуван жанар фида апIидича.
– Чухсагъул, Аьгьмад, интервью тувбаз. Гъит, вари ужудар ниятар кIулиз адагъуз Аллагь кюмек ишри!
