Зубайдат Шябанова
Ноябрин аьхиримжи йигъан Табасаран райондиъ Кьалухъ Мирзайин ччвурнахъ хъайи спортдин дараматдиъ волейболиан Ватан уьбхрударин йисаз ва хусуси метлеб айи дявдин операцияйин иштиракчйириз бахш дапIнайи Дагъустандин кубок бадали вуйи талитар кIули гъушну.
Му талитар жюрбежюр себебариан хайлин йисари дурухри гъахьнийи. Дурар сифте кIул’ан цIийи алауз жягьтлувал Табасаран райондин администрацияйи ва Дагъустан Республикайин волейболин федерацияйи улупнийи. Гьаци, 2022-пи йисан му важиблу талитар цIийи кIул’ан гъахуз хъюгъну. Дидхъанмина волейболиан Дагъустандин кубок Табасаран райондиъ гъабхури цци юкьубпи раж ву.
Талитариъ республикайин варитIан гужли 6 команда иштирак гъахьнийи. Дурар Табасаран, Хасавюрт районарин, Мягьячгъала ва Хасавюрт шагьрарин, ДГУ-йин ва ДГТУ-йин сборный командйир ву. Талитар ккергъайиз командйир кьюб дестейиз жара гъапIну, ва сифтейин талитар дестйирин айитI гъахьну. Натижайиъ полуфинализ Мягьячгъалайин «Столица», Хасавюрт, ДГУ ва Хасавюрт райондин командйир удучIвнийи. Полуфиналиъ Хасавюрт команда Хасавюрт райондиин, хъа «Столица» ДГУ-йиин гъалиб гъахьну.
Турнирин финалин талитарин натижа фициб шулуш, хайлиндар ккилигурайи. Зализ дуфнайи тамашачйирин арайиъ Табасаран райондин глава Мягьямед Къурбанов, волейболин ветеранар, тренерар ва волейболиин аьшкьлу касар айи.
Натижайиъ кубок «Столица» командайи гъадабгъну. Кьюбпи йишван сагьибар Хасавюрт шагьрин команда, хъа шубубпи йишван ДГУ-йин команда гъахьну.
«Йислан-йисаз Дагъустандин кубокдин талитариъ иштирак шулайи командйир кьувватлудар, ужудар мумкинвалар улупурайидар шула. Гьацира талитарин географияра яркьу шула. Йиз фикриан, кубокдин талитарин ад йислан-йисаз хъана артухъ хьибди», – гъапну гъалибчйириз пешкешар туврайи вахтна Мягьямед Къурбановди.
Ич сюгьбатнаъ Табасаран райондин волейболин мектебдин директор Садикь Уьсмановди кIули гъушу талитарин гьякьнаан чан фикрар ачмиш гъапIнийи.
«Табасаран райондин администрацияйи Дагъустандин Кубокдин талитар заан дережайиъди тешкил гъапIну. Мидин гьякьнаан райондиз талитариз лигуз дуфнайи Дагъустандин волейболин федерацияйин вице-президентар Мягьямад Гьяйирбеговди ва Анзор Аьбдулгьямидовди чпин улхбариъ гъапнийи.
Райондиз республикайин варитIан адлу ва улихь хьайи командйир гъафну. Гьяйифки, Табасаран райондин сборный команда талитарин сабпи тамшириъ магълуб гъабхьнийи. Му спорт ву. Талитариъ я гъалиб шулу, ясана магълуб. Декабрин аьхириъ Табасаран райондиъ Дагъустандин кьибла аьтрафарин волейболин лигайин финал гъябгъиди. Белки, думуган натижа ужуб шул. Мидланра гъайри, 10-11-пи декабри Табасаран райондин живанарин волейболин команда вари Дагъустандихъанди Ставрополь крайин Буденновск шагьриз СКФО-йин талитариз гъягъюз гьязур шула. Волейболиан республикайиъ улихьнаси гъахьи талитариъ Табасаран райондин живанарин командайи сабпи йишв гъадабгънийи. Дурариз му важиблу талитариъ хъуркьувалар ккун апIурхьа», – гъапнийи Садикь Уьсмановди.
