Зубайдат Шябанова

 
Цци 30-пи октябрилан 2-пи ноябриз Дагъустандиъ Урусатдин кьибла халкьарин культурайин ва спортдин фестиваль кIули гъябгъиди. Думу фестивалиъ ЮФО-йин ва СКФО-йин спортдин ва яратмишарин дестйир иштирак хьиди.

Гьаму йигъари Дагъустан республикайин гьюкмарин пресс-гъуллугънаан хабар тувганси, РФ-дин спортдин министрин сарпи заместитель Одес Байсултановди ва Дагъустандин премьер-министр Мягьямад Рамазановди фестивалин спортдин талитарин программа кьабул гъапIну. Дидиъ спортдин 10 дисциплина улупна: самбо, армрестлинг, фиджитал-баскетбол, мини-футбол, волейбол, тIил зигуб, дзюдо, деккучIимриан йивуб, гирйирин спорт ва спортдин программирование.
«2015-пи йисан учу сабпи ражари гьаму фестиваль Дагъустандиъ гъубхнийча. Ичв республикайи фестиваль заан дережайиъди тешкил гъапIну, гьадму гьисабнаан хяларин хатIасузвал уьбхбаан ва культурайин серенжемарин пайнаан. Вари хялар республикайиан разиди гъушну.

 
Гьаму йисан учу мушваъ нубатнан фестиваль тешкил апIурача. Дагъустан гизаф миллетар айи ва албагу республика ву. Мушваъ, аьхю Урусатдиъси, хайлин миллетар чпин жюрбежюр динариз дилигди, албагну саб хизанси яшамиш шула. Дагъустандиъ фуну вахтнара хялар шадди кьабул апIуру. Узу мина йиз хулазси гъюраза ва жарадарира чпи гьаци багъри хулаъ айиганси гьисс апIурашул», – гъапну Одес Байсултановди.

 
Фестивалин иштиракчйириз ва хялариз региондин ужударсдар спортдин майднар гьязур апIиди. Дурар гостиницйирихъди, ипIрубдихъди ва транспортдихъди тямин апIиди.
Дагъустандин спортдин министрин вахтназ вуди вазифйир тамам апIурайи Сажид Сажидовди къайд гъапIганси, турнириз ЮФО-йиан, СКФО-йиан, Крымдиан, ДНР-риан, ЛНР-риан, Запорожский ва Херсонский областариан делегацйир гъюз кка. Гьарсаб регионди чпин командайиъ 64 кас шлувал улупна.

 
Культурайин цирклин программа «Гизаф миллетар айи Урусат» форум тешкил апIбиинди кIули гъябгъиди. Дагъустандин культурайин министрин сарпи заместитель Мухтар Къурбановди мялумат туврайиганси, форумдин программайиъ «Лезгинка», «Дагъустан», «Дагъустандин жигьилвал» ансамблйир, операйинна балетдин театрин ва Дагъустандин филармонияйин солистар иштирак шлуваликан мялумат тувну.

Фестиваль гъябгъру йигъари Мягьячгъала шагьрин асас майдандиин СКФО-йин ва ЮФО-йин 19 региондин майднар ккатIарцциди.