Зубайдат Шябанова
Ноябрин эвелариъ Табасаран райондин администрацияйиъ муниципалитетдин глава Мягьямед Къурбановди хусуси метлеб айи дявдин операцияйиъ кечмиш гъахьи Гурхун гъулан агьали, аьхюну лейтенант Адам Аслановдин ва чан хушниинди хусуси метлеб айи операцияйиз гъушу Цухтигъ гъул’ан вуйи Замир Гьяжиаьлиевдин абйир-бабарихьна дурарин игит баяриз вуйи Кьягьялвалин орденар тувну. Ватанди чпин улихь дивнайи буржи тамам апIбаъ улупу игитвализ, дирбаш’вализ ва фидакарвализ дилигну, Адамдиз ва Замириз гьюкуматдин му заан пешкешар дурар кечмиш хьпан кьяляхъ тувну.
Орденар тувру серенжемдиъ РДйин юстицияйин министр Ханлар Пашабегов, РД-йин Халкьдин Собраниейин депутат Алавудин Мирзабалаев, райондин военный комиссар Садикь Мурадялиев, Жямяаьтлугъ палатайин председатель Аьлимирза Гьясанов, агъсакъларин Советдин председатель Кумалат Кумалатов ва жарадар айи.
Гюрюшдиъ Мягьямед Къурбановди, башсагълугъвалин гафарихъди сабси, дирбаш, ватанпервер баяр тербияламиш гъапIу эскрарин абйир-бабариз кIваантIан чухсагъул мялум гъапIну.
«Гьамусяаьт хусуси метлеб айи дявдин операцияйиъ хайлин ихь ватанагьлийир иштирак шула. Дурари ихь уьлкейин аьтрафар уьрхювалиъ ватанди чпиз улупнайи месэлйир лайикьлуди кIулиз адагъура. Аргъаж шулайи насли ихь игитар нумунади дисбан бадали, дурарин гьунарар ухьу гьархну ккундар. Райондин администрация хусуси метлеб айи дявдин операцияйин иштиракчйирин хизанариз чпиан удукьру вари кюмекар апIуз гьязур ву», – гъапнийи райондин главайи.
Кечмиш гъахьи эскрарин абйирбабариз башсагълугъвалин гафар гьацира Алавудин Мирзабалаевди ва Ханлар Пашабеговдира гъапнийи.
Серенжемдин кьяляхъ узу Адам Аслановдин дада ГьатIима Аслановайихъди сюгьбат гъубхнийза. «Йиз Адам аьхюну лейтенант, частнан командир вуйи. Дугъан хиликк 40 кас эскрар ккайи. 25-пи августдиъ дугъан бабкан духьну 28 йис тамам шулайи. Амма августдин 23-пи йигъан Украинайин Запорожьейин аьтрафариин гъахьи женгариъ йиз бай кечмиш гъахьну.
АдамтIан гъайри узуз сарун бай адарзуз. Балин 21 йис гъабхьибси, дугъаз швушв гъахнийза. Гьамус дугъаз кьюр бай а. Аьхюну худлин 6 йис, хъа бицIинурин 4 йис шула. БицIидариз чпин адаш амдруваликан хабар адар. Гьар хябяхъган зенгар апIури, телефондиан сар-сариз хабрар хътаури шуйча. Дугъан веледарира, чпин адашдиз зенгар апIури, видеойиан дугъахъди гафар апIури шуйи. Хъа гьамус гьар хябяхъган дурар, телефон хилиъ дибисну, адашдин зенгназ ккилигури шулу. Узу дурариз адаш амдруваликан фици пуза? ЦIиб улихьна вазари йиз уьмрин юлдашра кечмиш гъахьнийи. Йиз бай Адам саламдиз хъуркьнийи. Адаш фаракьат дапIну хьудпи йигъан йиз Адамди, учв частназ душну ккунду, гъапи.
«Мягъяна, жан дадайин, миннат вуйиз», – кIури, хилар гьачIаккну, дугъан улихь дийигънийза. Гьяятдизкьан дугъан кьяляхъ гьарйир апIури, «мягъян, гьаударза, уву кьяляхъ гъюрдара», – кIури хъивнийза.
Саб фти-вуш узухьди думу деетуз гъитри адайи.
«Гъитава, дада, узу гъягъюз», гъапиган, йиз гъурдаъ дючIюркьну дидиснайи дугъан палтар явашди буш гъапIза. СабцIиб душну, думу дийигъу. Хъасин узухьинди кьяляхъ илдицну, жаргъури дуфну, узу чIюркьюри чан хабаъ тIаъну. Гардандихъан хил хъадабгъну, «узу гъидиза, дада, кьяляхъ», дупну, удучIвну гъушу…
Бай адру дюн’яйиъ узуз йишв бихъурадарзуз. Магьа дугъан Кьягьялвалин орден варитIан марцци йишвахь дивну уьбхюраза», – гъапи, ишури, Гьятима Аслановайи.
Ихь игит баяр Адамдин ва Замирин гунгьарин аьфи апIри, чпин аьхиратдин хал ужуб ибшри. Гъит хусуси метлеб айи дявдин операцияйиъ иштирак шулайи ихь жигьилар вари сагъ-саламатди чпин хулариз хъадакну гъюри.
