Гюльнара Мягьямедова

Мягьячгъалайиъ Родопский бульварихъ хъайи шахматар уйнамиш апIру хулаъ, шагьрин администрацияйин тешкиллувалиинди, Ватан уьбхрударин йигъаз бахш вуди урус шашкйириан талитар кIули гъухну.

 

Талитариъ Мягьячгъалайиан, Каспийскдиан, Хасавюртдиан, Табаса-ран, Къарабудагъкент, Акьуша, Казбековский районариан шашкйир уйнамиш апIру 20 кас иштирак гъахьнийи.
Талитар швейцарияйин жюрейиинди 9 туриинди кIули гъухнийи. Каспийскдиан вуйи спортдин устадвализ кандидат Мягьямедрасул Зулпикьаровди, гъазанмиш апIуз мумкинвал айи 9 очкойикан 7 гъадагъну, сабпи йишв гъадабгъну.

6,5 очко хьади кьюбпи йишваз Табасаран райондиан вуйи Урусатдин спортдин устад Исмяил Исмяилов удучIвну. Гьадму кьадар очкйир гъазанмиш дапIну, шубубпи йишваз Къизилюртдиан вуйи спортдин устадвализ кандидат Къазакъбий Алданов удучIвну. Гъалибчйириз шагьрин администрацияйин дипломар ва медалар тувну.