Айгуль Мягяьмедова

20-пи майдиъ Дагъустандин Глава Сергей Меликов «Лезгинка» ансамблин Ялхъвнарин хулаз хялижвди гъафну.

 

Душваъ республикайин кIулиъ айири, машгьур ансамблин коллективдихъди гюрюшмиш духьну, артистарихъди сюгьбатар гъухну. «Лезгинкайин» вари талитариъ, фестивалариъ, майднариъ гъалиб хьуб аьдатнаъ абхъна. «Лезгинкайиинди» вари уьлкейи дамагъ апIура, фицики учву, дугъриданра, варитIан лайикьлудар вучва. Ихь гьациб фикир сарихьанра дигиш апIуз хьибдар», – гъапнийи Сергей Меликовди.
Дагъустандин Главайи ансамблин лишанлу гъахьи артистариз лайикьлу ччвурар ва наградйир тувну. Амет-Хан Султандин ччвурнахъ хъайи медалар тувдарин арайиъ «Лезгинка» ансамблин балетдин артист, Хив райондин Хив гъул’ан вуйи ихь ватанагьли, Дагъустан Республикайин халкьдин артист Жамиля Мамедовара (шиклиъ)айи.

«Учу жара регионариз, харижи уьлкйириз концертар хьади гъягъруган, дина ихь культура, аьдатар, халкьдин хасият гъабхуруча. Гьамци жара йишваъ айидарихьна хулан манишин гъабхурайивалин учу гъавриъ ача. Учкан жара йишвариъ айи ватангьлийир фукьан шад шулуш, иллагьки Донецкдин, Луганскдин халкьдин республикйириз гъушиган, гьисс гъапIнийча. Учу ду-швариз швнубна саб ражари душнача, хъа аьхиримжи ражари гъушиган, Урусатдин цIийи регионариъ 8 йигъан гъузнийча. Думу йигъари гъушу гастролйир, узу ансамблиъ айи вахт гьисабназ гъадабгъиш, пуз шулзухьанки, йиз уьмриъ варитIан акудар вуйиз. Концертарин кьяляхъ учухьна улариин нивгъар алди, «жвуван хулкан кIваин апIбаз учвуз чухсагъул» кIури, эскрар гъюруган, дициб кьимат туврайи гафари ич юкIвариз аьхю тясир апIуйи. Душв’ан кьяляхъ гъафиган, ич гъюнариин али аьхю жавабдарвал, ватанпервервал, учу апIурайи ляхнин важиблувал гьисс гъапIнийча. Учуз гьюкуматдин терефнаан кюмекра рябкъюрачуз, учу апIурайи ляхниз яв терефнаанра лайикьлу кьимат а. Учура халкьдин умудариз тялукь хьуз гаф туврача», – гъапнийи Джамиля Мамедовайи Сергей Меликовдиз.