Динара Маллааьгьмедова,
Дагъустандин Огни шагьур, 30 йис
Гьюрматлу «Табасарандин нурар» газатдин редакцияйин вакилар. Узу газатдин 47-пи нумрайиъ чап дапIнайи Зубайдат Шябановайин «Фуж дюз ву: дада дарш шубар?» макьала гъурхунза. Макьала кьабул гъабхьунзуз. Дидиъ анжагъ саб дюшюштIан улупнадаршра, дериндиан фикир апIуруш, гъи абйир-бабар ва веледар сар-сарин гъавриъ адрувалиан кми-кмиди арайиз гъюрайи месэлйир гъитIиркIна.
Гьетбетда, макьалайиъ туврайи суалариз, йиз фикриан, анжагъ саб жавабтIан адар – дада гьякь ву! Багъри веледар дадайихьна вижнасузди вуш, сарун жара касарикан ву пуза!? БицIидар варидариз а. Дурар саб-кьюб сяаьтназ гъитру йишв варидариз бихъуру. БицIидар хъади хяларди гъягъюз вая паркариъ лицуз вари дадйириз вахт а. БицIидар хъашра, хулаъ варидари ипIруб гьязур апIура. Думу сацIиб артухъдиси дапIну, дадайихьна больницайиз гъушиш, учвуз сувабтIан шулдар. Му саб.
Кьюб кIуруб, фунуб ляхнианра лисундин вахтна, ляхнин кьяляхъ вая выходной йигъари дадайихьна больницайиз улукьуз вахт абгуз вая ихтияр гъадабгъну гъягъюз шулу. Ихь Дагъустандиъ больницайиъ дахънайи багахьлуйиин улукьуб аьдат ву, ва дадайиин, адашдиин улукьуз гъягъюз ихтияр гъадабгъру вахтна, фунур вушра, ляхнин кIулиъ айири гъадагъа апIур кIури, фикир дариз. Самолетдиъди вая кьюб-шубуб суткайин арайиъ машиндиъди душну ккуни дюшюшарикан гьеле улхурадарза. Хъа гьацдар дюшюшариъра абйир-бабариин улукьуз мумкинвал гъабгиш, харжи даршул.
Ич сижарра сентябриъ больницайиъ дахъну гъахьнийи. Думуган узу гьар хябяхъган дугъахьна, мани хурагра хьади, улукьуз гъягъюри гъахьунза. Узуз юкьур бицIир азуз. ВаритIан аьхюнур 4-пи классдиъ айиз, хъа бицIинурин 6 ваз вуйиз. Узу вари ляхнар апIуз хъуркьразу. Больницайиз гагь вари хъади гъягъюйза, гагь аьхюну веледдихъди вари хулаъ гъитну, гьялакди душну гъюйза. Гьар хябяхъган узу гъяйиз сижар ккилигури шуйи. Узу хулаз гьялак шлуган, «сацIибсана узухъди деъну гъузава», кIуйи. Иццурайириз чпихьна вуйи манишин, гъайгъушин ва гьюрмат уьбхювалин гьиссар лазим ву. Гьаддиз шлубкьан ичв абйир-бабариин, чвйир-чйириин улукьури апIинай. Закурин йигъ фициб шулуш, саризра аьгъдархьуз.
