Зубайдат Шябанова
Улихьна йигъари Урусатдин жигьиларин сборный командайин ва Москва шагьрин «Локомотив» клубдин футболист Тимур Сулейманов Табасаран райондиз гъафну. Думу Мартин Сефербеговдин ччвурнахъ хъайи ЧвулатI гъулаъ айи, спортдин дараматдиъ жигьиларихъди гюрюшмиш гъахьну.
Ич сюгьбатнаъ машгьур спортсмен Мартин Сефербеговди ктибтганси, Тимур Сулеймановдиз Табасаран райондиз хялижвди гъяйиз ккилигури, баяр-шубарин сад йистIан артухъ вуйи.
«Тимурин абйир-бабар НичIрас гъул’ан ву. Хъа думу учв Дербент шагьриъ бабкан гъахьнийи. Тимурин 9 йис гъабхьиган, дурарин хизан Москвайиз яшамиш хьуз гъушну. Футболиан ужудар хъуркьувалар улупурайи живан олимпийский резервдин «Сокол» футболин клубдиз кьабул гъапIнийи. Душв’ан думу «Локомотивдин» академияйиз удучIвну.
Тимуриз райондиз хялижвди гъюз теклиф дивну йистIан артухъ гъабхьнийич. Магьа улихьнаси Хюряхъ гъул’ан вуйи футболин тренер Мурад Исмаиловдин кюмекниинди, думу ляхин кIулиз адабгъуз мумкинвал гъабхьунчуз.
Тимур Сулейманов Табасаран райондиъ аьхю гьюрматниинди кьабул гъапIну. Думу жигьиларихъди гюрюшмиш гъахьну. Дурарихъди гъабхьи сюгьбатнаъ дугъу деврин футболикан, думу спортдиъ айи мумкинваларикан, алахьру читинваларикан, машгьур футболистарикан, чан уьмрикан ва гележегдин планарикан ктибтну», – гъапнийи ич сюгьбатнаъ Мартин Сефербеговди.
Ихь халкьдин арайиъ жюрбежюр цирклариъ заан хъуркьувалар гъазанмиш дапIнайи вакилар гизаф а. Эгер дурари, Тимур Сулеймановдиси, жигьил насил чпин уьмрин ва пишекарвалин тажрубайихъди таниш апIури гъабхьиш, йиз фикриан, живанариз, хъа гележегдиъ вари ихь халкьдизра гизаф хайир хьибди.
