Зубайдат Шябанова
29-пи ноябриъ «Дагъустан» РГВК-йин студияйиъ республикайин глава Сергей Меликовди «прямой линияйиъ» шубуб сяаьтнан эфириъ дагъустанлуйирин 30-рихьна суалариз жавабар тувну. Дагъустандин главайихьна республикайин агьалйир жюрбежюр каналариан илтIикIури гъахьну. 60% суалар социалин сетариз дуфнайи.
Мидланра гъайри, дагъустанлуйириз прямой эфир гъябгъюрайи вахтнара студияйиз зенг дапIну, главайихьна илтIикIуз мумкинвал гъабхьну. Студияйихъди аьлакьайиъ Дагъустандин тамам апIру гьюкмин ва муниципалин органарин кIулиъ айидарра айи.
Республикайин главайихъди сюгьбат ккебгъайиз улихьна гьаму йисан январин вазли кIули гъубшу «прямой линияйин» натижйирикан гъулхну. Гъубху анализди субут апIурайиганси, думуган суалар асас вуди энергетикайи-хъди ва жямяаьтлугъ аьтрафар къайдайиз хпахъди, къанун ва ихтиярар уьрхбахъди, ЖКХ-йихъди ва рякъярихъди, образованиейихъди ва сагъламвалихъди аьлакьалудар вуйи. Ккудубшу 10 вазлин арайиъ аьхюну пай думу месэлйир гьял апIуз мумкинвал гъабгну.
Главайихьна варитIан гизафси илтIикIдар Мягьячгъала шагьрин агьалйир, дурарин кьяляхъ Каспийск, Дербент ва Дербент райондин ватандашар вуйи.
Гъубшу ражариси гьамусра «прямой эфириз» илтIикIурайидарин асас суалар ЖКХ-йин ва яшайишдин месэлйирихъди аьлакьалудар вуйи.
Сергей Меликовди гъулариз газ зигбан, электрикдин ва штарихъди тямин апIбан месэлйириз, инвалидариз тялукь кюмек тувбан, гьадму гьисабнаан ариш-веришдиъ ва инсанарин игьтияжар гьуркIру вахтна лазим шлу социалин таксийин месэлара кади, гьацира туризмдин цирклиъ нагъд пулиинди дару къайдайиина улдучIвбан, гизаф мертебйирин хулар ва хуларин багахь аьтрафар къайдайиз хпан месэлйириз, шагьрарин аьхю ва цIийиди тикмиш апIурайи гизаф мертебйирин хуларин ТСЖ-йин ва идара апIру компанйирин ляхин гюзчиваликкна гъадабгъбан месэлйириз фикир тувну.
Агьалйирихьан теклифарра гъюрайи. Магьа чан видео суалнаъ жямяаьтлугъ вакил Кайрав Кагермановди М.Горькийин ччвурнахъ хъайи кючейиъ архитектор Анатолий Ягудаевдин «Кюкйир хьайи риш» кемшрин ядигар шулуш, цIийиди арайиз хуб ккун гъапIнийи.
Хайлин йисар улихьна Мягьячгъала шагьрин 1-пи нумрайин мектебдин гъвалахъ хъайи думу ядигар аьлдяхну гъубхну.
«Думу бицIи ядигар арайиз хуз пулихъди аьлакьалу читинвалар сабра хьидар. Ухьу думу ядигар дивурхьа», – жаваб тувну главайи.
Сергей Меликовди гьюлерин сиягьятчи Евгений Гвоздевдин юбилейиз республикайиъ яхт-клуб арайиз хпан кьастназ чан разивал тувну.
Мягьячгъала шагьриъ Гьяйвнарин театр абццбан гьякьнаан вуйи суал главайиз лапра кьабул гъабхьнийи.
«Гизаф маракьлу фикрар ву. Узу дурарин тереф уьбхюрза. Ухьуз, дагъустанлуйириз, кчIихбарин жюрйирси вая футболси, гьяйвнарин спортра аьдатиб вухьуз. Республикайиъ гьяйвнарин завод гъюбхюнхьа. Ухьухь гьявнарин спортдин мектебар жанлуди артмиш шула. Гьяйвнарин театризра республикайиъ чан йишв бихъиди кIури фикир вуйиз», – гъапнийи Сергей Меликовди.
Дагъустандин главайи эфириъ 900 агъзур инсан штухъди тямин апIуз мумкинвал тувру «Чиркей – Мягьячгъала – Каспийск» шид гъабхурайи магистраликан, улубкьурайи йисан февралин вазли агьалйирин улихьна призентацияйиз адабгъру рякъярин ва транспортдин комплексдин артмиш’валин цIийи концепцияйикан, региондиъ энергетикайин цирклиъ тIаърайи цIийи мумкинваларикан ктибтну.
Эфир гъябгъюрайи вахтна гьадму сяаьт студияйиъ гьял гъапIу суаларра хайлин гъахьнийи.
Мисалназ, Мягьячгъалайин агьалйир шагьрин гъирагъдиъ ерлешмиш дубхьнайи Дагъустандин кардиология-йин ва кIван гьендемарин хирургияйин центриз гъягъру транспорт адрувалин месэла гъитIибкIну. Суал гьадму сяаьт меркездин мэрихьна хътапIну. Дугъу, гьаму йисан 1-пи декабрилан башламиш дапIну, Мягьячгъала шагьриан кардиоцентриз 188-пи маршрут ляхник кипруваликан мялум гъапIну.
«Прямой линияйиз» гъафи гьарсаб суал, гьадму гьисабнаан эфириз удудучIвдарра, тартиб апIиди.
«Прямой эфир анжагъ ухьуз гьамушваъ гъеерхьу суалариинди ккудубкIнадар. Учу вари суалариз лигурча. Гъубшу йисанси гьамусра, гьаму багарихьди дагъустанлуйириз чпин суалариз лигру ва гьял апIру вахт тяйин дапIну, варидариз мялумат тувдича. Узу ватандашарихъди прямой эфир гьаму вахтна гъабхувал ккун гъапIнийза, гьаз гъапиш учу бюджетдин месэлйир гьеле гьял апIури амича. Гьаддиз, бязи суалар 2024-пи йисаз вуйи бюджетдик кирчуз ва 2025-2026-пи йисари пландиз гъадагъуз мумкинвал хьибди», – къайд гъапIнийи аьхириъ республикайин главайи.
