Умгьанат Сулейманова
Дербент шагьриъ яшамиш шулайи Рафис ва Лиана Асланбеговарин хизандиан шаду хабар дуфна – дурарин кьюдюхрар шубари – Эсмирайи ва Аидайи – химияйин ЕГЭ-йиан сари 100 балл, тмунури 97 балл гъазанмиш гъапIну. Дербент шагьриъ химия туврайи выпускникарин арайиъ заан 100 балл гъадабгъур сар Эсмира Асланбегова ву. Абайинур шул байра, кIуруганси, му кьюдюхрарик чпин бажаранлу абйир-бабарин лишнар ка.
Рафис Мягьямадшафие-вич Асланбеговди Саранск шагьриъ ерлемиш дубхьнайи Н.П Огарёвдин ччвурнахъ хъайи Мордовияйин гьюкуматдин медицинский университетдиъ педиатрияйин факультет ккудубкIну. Гъи думу Дербент шагьриъ Г.А. Илизаровдин ччвурнахъ хъайи медицинайин колледждиъ мялимди лихура. Гьадушваъ дугъан хпир Лиана Мягьямедовна Аслабеговайира математикайин ва физикайин дарсар кивра. Дугъура, сифте Ростовдиъ Зернограддин педагогвалин училище, хъасин Таганрогдин педагоговалин институтдиъ физикайинна математикайин факультет ккудубкIну. Дупну ккундуки, Эсмирайин (шиклиъ арчлахъанди) ва Аидайин адашдин ва дадайин терефарианра багахьлуйир аьхюну пай духтрар ва мялимар ву. 2023-пи йисан урус чIалнан ва биологияйин гьюкуматдин саб вуйи имтягьнариан гьарсабдиан 100 балл гъазанмиш гъапIу Табасаран райондин ТIаттларин кьялан мектебдиъ урхури гъахьи Гьаваханум Мягьямедовара Лианайин халуйин риш ву. Фу гъапишра, шид архназ гъябгъюру – гъи му кьюдюхрар чпин сихлихъна гъушну.
Му шаду гьядисайихъди узу сифте Рафис ва Лиана тебрик гъапIунза, хъасин Эсмирайихъди ва Аидайихъди сюгьбат гъубхунза. Мурарин хизандиъ юкьур уткан, зигьимлу шубар а. Эсмира ва Аида бицIинудар ву. Аьхюну риш Алинайи ДГУ-йиъ экономикайин ва юридический факультетар ккудукIну, хъасин уьмрин пише дигиш апIуз ният дубхьну, Г.А. Илизаровайин ччвурнахъ хъайи медколледждиъра гъурхну. Мадинайи Мягьячгъалайиъ Дагъустандин медицинайин университетдиъ 6-пи курснаъ урхура ва вуз уьру дипломдиз ккудубкIура. Гъи магьа бицIину шубарирра, аьхю чйирин шилнаъди гъягъюри, заан натижйир улупура.Адашдихьанна дадайихьан мурарин хъуркьувалариинди дамагъ дарапIди гъузуз шулинхъа?!
Узу шубарихьан, экзамендихьна гьязур хьуз фуж репетиторди гъидисунчва, кIури гьерхиган, дурари, дадайихьинди лигури, кьюриддира инчI ккидипнийи.
– Гъапиш хътругъарва, амма дурар репетиторарихьна саб ражарикьан гъушундар. Онлайн табшуругъар чпин кIул’инди гьял апIури, гьязур шули гъахьну. Йиз кьюрид шубари гъазанмиш дапIнайи хъуркьувалариз, Дербентдин 18-пи нумрайин, Урусатдин Игит М.В. Абраменкойин ччвурнахъ хъайи Варидюн’яйин культурайин гимназияйиъ лихурайи дурарин сабпи мялим Эльнара Гулиевайиз чухсагъул пуз ккундузуз. Дугъриданра, бицIидарихъ зегьмет зигру мялим ву. Гъи мицисдар мялимар думукьан адар. Нагагь баяр-шубарик, урхубдихьна вая жара ляхнихьна вушра удукьувал каш, дугъу думу бицIидарихь ачухъ хьуз гъитри шулу. Йиз шубарихъ дугъу гъизигу зегьметнан натижа гъи магьа мялум дубхьна. БицIирин хъуркьуваларин шибритI ужуб вуйиган, дугъан уьмрин рякъра гьациб марцциб хьибди, – жаваб тувнийи йиз суалназ шубарихъанди дурарин дадайи.
– Хъа шубар наана урхуз гъягъбанди, фунуб пише ктабгъбанди ву?
– Дурар, чпин уьмрин пише вуди духтирвал бисуз ният ади, Мягьячгъалайиъ Дагъустандин гьюкуматдин медицинайин университетдик кучIвуз гьязур шула.
– Хъа имбу имтигьнариан дурарин баллар фицдар гъахьну?
– Гьеле вари предметариан баллар дупнадар, хъа урус чIалнан ЕГЭ-йиан Эсмирайи 94 балл, Аидайи 91 балл гъазанмиш гъапIну. Хъа математикайиан кьюридаризра «хьуб» гъабхьну.
Эсмирайи ва Аидайи хьубпи классдихъанмина вари дарсариан заан аьгъювалар улупури гъахьну. Дурар гьар йисан Дербент шагьриъ урхурайидарин арайиъ кIули гъягъру жюрбежюр предметариан олимпиадйириъ иштирак шули гъахьну. Гъит, ихь шубарин гележегдиз вуйи кьастар кIулиз удучIври.
