Гюльнара Мягьямедова

2-пи феврали Хив райондин глава Ярмет Ярметовди гъурулушдин подразделенйирин ва муниципалитетдин идарйирин кIулиъ айидарихъди яркьу заседание гъубхну. Гьял апIбан бадали заседаниейиз хусуси метлеб айи дявдин операцияйин иштиракчйириз ва дурарин хизанариз яшайишдин кюмек тувбан месэла адабгънайи.

Думу месэлйир гъитIирккайиз Ярмет Ярметовди Дагъустан Республикайин главайин багахь хьайи илимдин ва образованиейин Советдин заседаниейиъ Сергей Меликовди гъитIиркку образованиейин артмиш’валин асас рякъярикан гъапнийи. Райондин главайи образованиейин цирклиз жигьил мялимар жалб апIбан бадали кьабул апIурайи серенжемар гужли апIуб ккун гъапIнийи.

Заседаниейиъ хусуси метлеб айи дявдин операцияйин иштиракчйириз ва дурарин хизанариз вуйи льготйирин месэла гьял апIбаъ УСЗН-дин директор Рафидин Юсуфов ва Хив райондин СОН-дин директор Аьбдулязиз Агъамирзаев, райондин больницайин кIулин духтрин заместитель Наида Пашаева иштирак гъахьнийи. Дурарин гафариинди, райондиъ хусуси метлеб айи дявдин операцияйин иштиракчйириз ва дурарин хизанариз кюмек тувбан месэла сабпи йишв’ин дийибгъна. Хусуси метлеб айи дявдин операцияйин иштиракчйириз айи льготйирикан улхури, Ярмет Ярметовди дурариз жилин участокарин ерина пул тувбан месэла гьял апIурайиваликан гъапнийи.

Заседание давам апIури, райондин администрацияйин главайин заместитель Агъамирзе Гьямзабеговди райондиъ уьмриз кечирмиш апIурайи яшайишдинна экономикайин артмиш’валин месэлйирикан , милли проетарикан ктибтнийи.
Райондин ЖКХ-йин начальник Заур Ибрагьимовди хъархъвас дабхьру участокар регистрация апIбан ва зирзибил абхьру контейнерар гъадагъбакан мялуматар тувнийи.

Райондин заседаниейин иштиракчйири образованиейин гъуллугъчйирин штатар къайдайиз хпан (оптимизация), пространственный улупбарин милли гъурулушдин (НСПД) ва хъана жара учIру месэлйир гьял гъапIнийи.