Гюльнара Мягьямедова

Республикайин меркездиъ «Мягьячгъала-Дербент» маршрутдиинди гьамусдин деврин электропоезд деебтбан серенжем кIули гъубшну. Думу серенжемдиъ Дагъустандин Глава Сергей Меликов, ОАО «РЖД»-йин Кафари Кавказдин филиалин рукьан рякъюн начальник Сергей Задорин, Кафари Кавказдин шагьрарин арайиъ пассажирар гъахру компанияйин генеральный директор Антон Глеба, РФ-дин Президентдин СКФО-йиъ вари ихтиярар айи вакилин заместитель Владимир Надыкто, републикайин правительствойин вакилар ва гьацдар жарадар иштирак гъахьнийи.

 

Гьамусдин деврин электропоезд гъийин вахтнан тIалабариз жаваб тувруб ву: ужудар дусру йишвар, гъагъар дивуз яркьу тахтйир, велосипедар дивру йишвар а, маниди вуйи вахтна сирин апIру, аьхъюди вуйи вахтна мани апIру гъурулушарихъди тямин дапIна.

Электропоезддин айитI йишв Дагъустандин гьарсаб тереф улупру шиклариинди ккабалгна. Цаларик милли аьдатарикан, табиаьтдин уткан йишварикан ихтилатар, халкьдин шаирарин шиърар ка, QR-коддиинди Дагъустандиз гъафи хялариз тарихи машгьур йишварикан ктибтру интерактивный гид ва гьацдар жара гъулайвалар а.

«2021-пи йисхъанмина ихь республика туристариз кьабул дабхьна, региондиз гъюрайи туристарин игьтияжар гьуркIри, рукьан рякъюн транспортдиъди гъахру гъагъарра артухъ шула. Гьар йигъан мина-тина гъягъюз ктабгъру транспорт хатIасузуб, рягьятвал кади гьяракатниинди йишв’ина хъуркьруб вуди ккунду», – гъапну республикайин кIулиъ айири.

«Гьаму проектди транспортдин аьлакьа къайдайиз хибди: сад йигъандин арайиъ Мягьячгъалайинра, Дербентдинра уткан йишвар гюзет апIуз мумкинвал тувди. Туристариз думу ужуб хабар ву, хъа республикайин агьалйириз гъулайвалиинди ляхниз гъягъюз, рягьятвал гъадабгъру йигъар хизандихъди шагьрин гъирагъдиъ адауз ужуб мумкинвал ву», – гъапнийи Владимир Надыктойи.

Уьру бафта гьадабтIбан кьяляхъ Сергей Меликов ва дуфнайи хялар электропоезддин айитI йишваз лигуз гъушнийи.