Зубайдат Шябанова
Цци мартдин эвелариъ Къизилюрт шагьриъ «Химик» спортдин дараматдиъ яшар 14 йис дархьи бицIидаринна живанарин арайиъ шашкйириан республикайин талитар кIули гъушнийи. Душваъ Табасаран райондин Ягъдигъ гъул’ан вуйи Альфия Ражабовайи кьюбпи йишв гъибисну.
Альфия Ражабова Табасаран райондин Ягъдигъ гъулан 1-пи нумрайин мектебдин 6-пи классдиъ урхура. Дарсарианра дугъаз хъуркьувалар а. Шубубпи классдиъ урхурайиган, Альфия шашкйириин машгъул гъахьну, ва гьаддихъанмина дугъу му уйнамишариъ хъуркьувалар улупура. Альфия 2023-пи, 2024-пи ва гъябгъюрайи 2025-пи йисари чан таярин арайиъ шашкйириан Табасаран райондин чемпион гъахьну. Республикайин дережайин талитариъ иштирак хьуз сабпи ражари гъягъруган, думу 4-пи классдиъ урхурайи.
Цци дугъу республикайин талитариъ 14 йис хьайиз вуйидарин арайиъ кьюбпи йишв гъазанмиш гъапIну. Сабпи йишван сагьиб хьуз Альфияйиз гьацI балл гьубкIундайи.
Шашкйириан аьгъювалар Альфияйи Хючна гъулаъ бицIидаринна живанарин спортдин мектебдиъ Урусатдин шашкйирин спортдин лайикьлу устад Исмяил Исмяиловдихь гъадагъура. Альфияйилан гъайри, думу мектебдиз Ягъдигъ гъул’ан юкьурсана бай-риш гъюра. Абйир-бабарин теклифниинди Исмяил Исмяиловди бицIидариз шашкйир уйнамиш апIуз улупура. Къайд дапIну ккундуки, дугъу чан дарсарихъан сарихьанра пул бисурадар. Аьксина, бицIидарин гьевес хъана артухъ апIури, дурар республикайиъ шашкйириан гъягъру вари талитариз чан машиндиъди гъахуру.
«Шашкйир узуз лап кьабулди вузуз. Бязи вахтари саб гьяфтайин арайиъ Хючназ спортдин мектебдиз гьар йигъан, саспиган сад-кьюд йигъ гъидипури, гъягъюри шулча. Узухъди ич гъул’ан хъана юкьурсана бицIир гъюра. Учлан гъайри, душваъ аьгъювалар гъадагъурайидар хъана жара гъуларианра а.
Гъубшу вазли гъабхьи Дагъустандин чемпионатдиъ 80-тIан артухъ иштиракчйир айи. Узу йиз таярин арайиъ 10 партияйиъ иштирак гъахьунза. ВаритIан гъагъиди сабпи йишван сагьиб гъахьи Къизилюртдиан вуйи Сафия Уьмаровайихъди гъабхьунзуз. Дюзди гъапиш, узуз варитIан важиблу талит йиз тренерихъди гъабхру партия шулзуз. Узу гьар ражари дугъ’ин гъалиб хьуз вари рякъяр агураза. Хъа гьелелиг шуладарзухьан», – гъапнийи сацIиб инчIра кади ич сюгьбатнаъ Альфияйи.
В.Белинскийи гъапиганси, урхурайири чан мялим бягьснаъ айи талитчиси дарди, нумунаси гъадагънаш, думу мялимтIан зиина удучIвудар. Хъа ихь риш шашкйириан аьхю устадрихъди, машгьур тренерихъди талитнаъ а. Ухди-кьанди мялим бажаранлу урхурайирихьан магълуб хьиди. Хъа гьелелиг вахт даруб мялимдиз чазра рябкъюра.
Улихьна йигъари Альфияйиз цци 20-пи апрели Мягьячгъала шагьриъ шашкйириан аьхюдарин арайиъ гъябгъру республикайин турнириъ иштирак хьуз теклиф гъафну. Ихь риш думу чемпионатдиз гьязур шула.
Нубатнан талитариъ Альфияйиз хъана заан хъуркьувалар ккун апIурхьа.
