Мейлан Нежефов

Гъи Украинайин жилариин гъягъюрайи женгариъ жюрэтлувал улупурайи ихь баяриз саб фициб вушра кюмек тувуз ватанагьлийири чарйир агура. Гьациб ният кIваъ ади, Дагъустандин лайикьлу артист, мяълийирин устад Мар’ям Къазиевайи 21-пи февралиъ Хив райондин культурайин хулаъ чан жягьтлувалиинди тешкил дапIнайи концерт кIули гъубхнийи.

 

Концертдиъ Дагъустандин культурайин лайикьлу гъуллугъчи, табасаран шаир Эльмира Аьшурбеговара иштирак гъахьнийи.

– Ав, ихь халкьдин варитIан юкIв али мяълийирин устад Мар’ям Къазиевайи заан дережайин, гизаф мяналу концерт тешкил гъапIнийи. Гьарсаб мяъли аьшкьниинди кьабул апIурайи ихь халкьдизра чухсагъул. Концертдин аьхириъ Марьям бажи сягьнайилан зализ гъафнийи ва, шлин фу мяъли ебхьуз юкIв хъимиш гьерхри, залиъра мяълийир гъапIнийи, хъасин сягьнайиланра тIалабар бегьем гъапIнийи. Гьаци концерт лап ярхира гъабхьнийи, амма Мар’ям Зейнудиновнайи, инсанар концертдиан разиди ва шадди гъягъюз, чан кьувват, вахт, кIван жумартвал гьяйиф апIурадайи.

Гьадму, йиф ади, рякъяриин миркклуцI улубзнайи йигъан, учв машиндин рулихъ хъади Дербентдиан райондиз дуфну, концерт улупну ва йишвну кьяляхъ хътаку вахтнара Мар’ям бажийи саб жизбира бизарвал улупурадайи: думу гьамциб йишван сенграриъ айи ихь баяриз жизбийин кюмек апIуз, дурар чиб вардин кIваинди айивалиин, чпиз мяълийир бахш апIурайивалиин шад хьуз мумкин вуйи ляхин удукьувалиин разиди айи.

Зал бегьем абцIундайишра, гъадагъу билетарин пул, кюмек вуди конвертариъди гюзгдин ишкIиъ ипуб ва Мар’ям бажийиз залиан гъапIу шабшарра кмиди уч дапIну, цIар-цIарди варибдин сиягь гъапIнийи. Думу ихь баярихьна кюмек саягъ рубкьрувалиин инанмиш вуза.

Чухсагъул чпиз, Казбек Къазиев кIулиъди, му ляхин кIули гъабхуз бакар гъахьи вари ихь культурайин цирклиъ лихурайидариз, райондин администрацияйиз, Мар’ям Зейнудиновнайихъди иштирак гъахьи дугъан сягьнайин гъарашугъариз! Учвуз вардиз хъанара кьувват туври! Ихь баяр сагъ-саламатди кьяляхъ дуфну, багарихьди гъалибвалин концертдиз уч шлуганси ибшри!» – гъапнийи Эльмира Аьшурбеговайи.