Нариман Шихялиевдин ччвурнахъ парта ачмиш гъапIну
Наргиз Гюлечова
Улихьна йигъари Каспийск шагьриъ Урусатдин Игит В.Г.Казанцевдин ччвурнахъ хъайи 15-пи нумрайин мектебдиъ ихь ватанагьли, Табасаран райондин ТIивак гъулан агьали Нариман Шихялиевдин ччвурнахъ «Игитрин парта» ачмиш гъапIну.
КIваин апIураза, Нариман Шихялиевдиз саб ваз улихьна Урусатдин Президентдин указдиинди «Урусатдин Игит» (йикIбалан кьяляхъ) ччвур тувну. Ватан бадали чан жан сарф гъапIу Нариман Шихялиев кьюб Кьягьялвалин орденарин сагьибра вуйи. Хусуси метлеб айи дявдин операция ккебгъу сабпи йигъланмина офицери Ватандин улихь чаин али буржи тамам апIури гъахьну. Ккудубшу йисан 2-пи июлиъ Курский областдин Коренево поселокдиъ гъягъюрайи женгариъ иштирак шулайи вахтна, ихь игит, гъагъи зийнар духьну, кечмиш гъахьнийи.
Каспийск шагьрин мектебдиъ Нариман Шихялиевдиз бахш вуйи «Игитрин парта» ачмиш апIбан мажлиснаъ Дагъустан Республикайин Халкьдин Собраниейин депутат Расим Гьяжиагъаев ва мектебдиъ кадетарин классдиъ урхурайи баяр-шубар иштирак гъахьнийи.
Серенжем Урусатдин ва Дагъустандин гимнар тамам апIбалан ккебгънийи. Республикайин парламентдин депутатарикан сарпир вуди чан хушниинди хусуси метлеб айи дявдин операцияйиз гъушу Расим Гьяжиагъаевди Нариман Шихялиевдикан, Ватан бадали ихь эскрари апIурайи гьунарарикан мектебдиъ урхурайидариз ктибтнийи.
«Игитрин парта» ачмиш апIувал – му аьдати жюрейин серенжем дар. Думу ихь уьмур, гележег ва тарих ву. Мектебариъ чпиз гьамци «Игитрин парта» бахш апIурайи касар ухьу чешнеди гъадагъну ккунду. Эгер дицдар касарикан улихьна вахтари ухьу китабариан урхури, ухьуз дурар фильмариан рякъюри айиш, гъи думу игитар ихь арайиъ а. Хилиъ яракь дибисну Ватан уьбхюри, гьунарар апIурайи касариз ухьу гьюрмат апIури ккунду. Гьацдар кIубан ва игит касарикан вуйи ихь чве Нариман Шихялиевра.
Учв ротайин командир вуйихъанминатIан узуз думу лап ужуди аьгъяйзуз. Магьа гъира дугъан телефондин нумра «Нариман Дюб., 5-я рота» дибикIну, йиз телефнондик кимийиз. Му кас, дугъриданна, гьякьикьи эскер вуйи. Гьаддиз, гъи ихь уьлке гьамциб аьгьвалатнаъ айиган, дугъхьан гъирагъдиъ гъузуз гъабхьундар. Нариман ухьуз варидиз, чан дустариз, багахьлуйириз гьаргандиз Игитди гъузди, – гъапну депутатди.
Чан улхуб давам апIури, мектебдиъ урхурайи баяр-шубарихьна илтIикIну, Расим Гьяжиагъаевди жвув Урусатдин, Дагъустандин агьали вуйивалиинди ва гьарури чан миллетдиинди дамагъ дапIну ккунивал къайд гъапIнийи.
«Узу мици гьаз кIура гъапиш, гъи ихь гьюкуматди пис касарихъди дявдин женгар гъахура. Писвализ я дин, ясана миллет айиб дар. Гьаддиз ухьуз гьаруриз жвуван Ватандин, республикайин, халкьдин тарих аьгъяди ва, икибаштIан, сар-сарихьна ухьу гьюрмат ади, уж’вал апIури яшамиш духьну ккунду. Гьадмуган ихь ара рабгъуз гьич сарихьанра хьибдар», – гъапнийи Расим Гьяжиагъаевди.
Серенжемдин аьхириъ Расим Гьяжиагъаевди ва мектебдин мялим Сейранат Аьбдуллаевайи «Игитрин парта» ачмиш гъапIнийи, хъа уч духьнайидар вари, Нариман Шихялиевдин рюгьназ гьюрмат улупури, саб дакьикьайиъ ккебехънура гъузнийи. Ачмиш гъапIу партайихъ мектебдиъ ужуди дарсар урхурайи 5-пи классдин баяр-шубар деънийи.