Зубайдат Шябанова
Декабрин 11-пи йигъан Мягьячгъала шагьриъ Ипподром микрорайондиъ РД-йин МВД-йин УКОН-дин гъуллугъчйири Владимирский областдиан Дагъустандиз наркотикар масу тувуз дуфнайи 21 ва 22 йисариъ айи кьюр бай гъидисну. Думу баярихь лизи хюси дярябгънайи наркотик абхьну гьязур дапIнайи швнуб-саб багълама гъидихъну. Экспертизайи улупганси, думу медоморфин наркотик вуйи.
Силисдикк ккайидари тахсиркарвал гардандиъ гъибисну ва чпи онлайн-наркомаркетарикан сабдин курьерар вуйиваликан гъапну. Дагъустандин меркездиз дурар куратори улупу жини йишварикк наркотикар ккивуз гъафидар вуйи. Кьюрид баяриина уголовный дело абццна.
Дурар дисайиз 10 йигъ улихьна Мягьячгъала шагьриъ Дагъустандиъ айи МВД-йин вакилари, медоморфин аьхю кьадарнаъди жини йишварикк ккиврайи 17 йисаъ айи живан риш гъидиснийи. Думу Къумторкъала райондиан ву. Ахтармишар гъахруган, дугъахь жин апIуз хъудрукьди хьимбу 251 грамм медоморфин наркотик гъибихъну. Силисариъ шуру ктибтганси, дугъу швнуб-саб багълама Мягьячгъала шагьриъ жюрбежюр йишвариъ ккивну. Дугъу улупу йишвариккан полицияйин вакилари 320 граммтIан артухъ наркотикар ккадагъну.
Наркотикар аьхю кьадарнаъди тарагъбаз лигну, риш хайлин йисариз азадвалихъ мягьрум апIуз мумкин ву.
Гьаму жюрейин дюшюшарикан мялуматар республикайиъ гьар йигъан ерхьуру. Республикайин меркездиъси, наркотикар жини йишвариъ тарагъурайи наркокурьерар жара шагьрариъра ва дагълу районариъра дисура. Урусатдин шагьрариан гъюрайидар ва ихь живанар, бицIидар му тахсиркарваларихьна жалб дапIнайивали республикайиъ наркотикар ишлетмиш апIурайидар артухъ духьнайивал ва наркотик иша гъябгъюрайивал субут апIура.
Ич сюгьбатнаъ республикайин наркодиспансерин духтир-нарколог Раисат Сагъидовайи ктибтганси, наркодиспансерин больница гьамусяаьт наркоманари абцIна. Дурарин арайиъ яшар бегьем духьну адру наркоманарра а.
«Къанундиинди гъадагъа дапIнайи сурсат жигьилариси мектебдиъ айидарира ишлетмиш апIуру. Хайлиндари, чпиз ккун гъабхьи вахтна думу зегьер дипурча, кIури фикир апIура. Амма сабпи дозайин кьяляхъ наркотикдин асиллувалиъ ахърайидар гизаф а. Гьацдар живанар гьамусяаьт ич наркодиспансериъра швнур-сар а. Отделениейин палатйириъ инсан алдру койка адарди сад йигъра шулдар. Мушваъ Дагъустандин вари районариан наркоманар ва ичкийин асиллувалиъ ахънайидар шулу. Чпин яшариз дилигди, гъи хайлин живанариз ва бицIидариз наркотикарин зегьерлуваликан хабар ашра, дидин тIяаьм дадмиш апIуз иштагь а. Мисалназ, гьамусяаьт наркодиспансериъ айи Жанна гъадагъурхьа. Думу Мягьячгъалайиан ву. Думу мектебдиъ ужуди урхурайир вуйи. Лазим дару юлдшарихъ хъахъну, шуру медоморфин наркотик ишлетмиш апIуз хъюгъну. Дугъаз чав сабпи доза фици ишлетмиш гъапIнуш, кIваинди ими. Шагьрин кючейиъ дустарихъди сатIиди лицурайган, дустари чпи ишлетмиш гъапIу лизи хюсиб сурсат дугъахьиндира гьачIабккну. Амма думу фтиинди ккудубкIуруш, гъапундайи. Гьадму сабпи дозайин кьяляхъ, риш наркотикарин асиллувалиъ ахъну. Дугъу абйир-бабарихьан жиниди, чан дустарихьан наркотик масу гъадабгъуз хъюгъну. Дарсарианра думу кьяляхъ хъахъну. Гьаммишан кIул иццури, жандиъ гьавйир адарди гъахьну. Абйир-бабари шуран хасият дигиш шулайивал яшариан удучIвурайивалси гьисаб апIури, артухъ фикирра туври гъахьундар. Аьхирки, нубатнан доза ишлетмиш дапIну амриъ адру риш чан дадайиз гъидихъну. Ич диспансериъ ади дугъан саб ваз шула. Дугъаз гьии гъабхьну. Къалп дустарихъди дугъу аьлакьйир уьрхюри адар. Ва ич сюгьбатариъ дугъу сарун наркотик уьмриъ зат ишлетмиш дарапIруваликан гъапну.
Жаннайихъди саб палатайиъ айи Аминайинра наркодиспансериъ сагъвал къайдайиз хури гьяфтатIан артухъ шула. Дугъан яшар 25 йистIан дар. Наркотикдик думу чан жилири каънийи. Жилир гъубшу йисан гъакIну. Амина наркодиспансериъ ахъри шубуб кIуру раж ву. Гьар ражари дугъу сарун наркотик ишлетмиш дарапIрувалин гаф туври шулу. Хъа гьамушв’ан удучIву жарадарси думура бицIи вахтналан хъана дидихьна жаргъура. Гьаддиз узу, йиз тажрубайиз ва аьзарлуйирин хасиятназ дилигну, ачухъди кIурза: «улихьдин наркоман» кIуру гафар дюзидар дар. Наркотик ишлетмиш апIури гъахьир гьаммишандиз наркоманди гъузру», – гъапнийи Раисат Сагъидовайи.
Духтри къайд гъапI-ганси, бицIирин гележег ккабалгбаъ хизанди аьхю роль уйнамиш апIура. Мисалназ, наркотикарин асиллувалиъ ахънайи бицIидар ва живанар асас вуди чпин абйир-бабарин терефнаан манишин ва фикир цIибтIан адрудар ву. Хулаъ дурариз гьудрубкIрайи манишин, дуствал ва гьацира чпихъди саб гаф апIру юлдшар дурари кючейиъ агура. Гьаддиз наркодиспансерин духтрари, живанарин сагъвализ лигури, абйир-бабарихъдира сюгьбатар апIури шулу.
Урусатдин МВД-йин улупбариинди, 2025-пи йисан сабпи шубуб вазли Урусатдиъ 60 агъзуртIан артухъ наркотикарихъди аьлакьалу тахсиркарвалар гьисабназ гъадагъна. Хъа Дагъустандиъ гьарсаб хьубпи тахсиркарвал наркотикарихъди аьлакьалуб ву. Дагъустандин МВД-йи наркотикарихъди аьлакьалу тахсиркарвалариан цирклиан йисандин натижйир гьелелиг йивнадар. Хъа, гьар вазли шулайи тахсиркарвалариз гъилигган, гъубшу йисандин улупбартIан дурар лап заандар шлувал саризра жиниб дар. Дидкан ухьу натижйир гъивган улхидихьа.
