Умгьанат Сулейманова
2024-пи йисан 27-пи декабри Дагъ. Огни шагьриъ ерлемиш дубхьнайи К.А. Къурбановдин ччвурнахъ хъайи циркнан мектебдиъ, хусуси метлеб айи дявдин операцияйиъ иштирак шулайидарин, душваъ чпин жанар фида гъапIу абйирин баяр-шубариз ва гьацира 21 йитим бицIидариз ЦIийи йисаз вуйи аьхю шадлугънан машквар тешкил гъапIну.
Цирковой мектебдин живан артистарин иштираквалиинди машквраз дих дапIнайи 150 бицIириз ужуб, маракьлу программара гьязур дапIнайи. Машквран аьхириъ дуфнайи бицIидариз ЦIийи йисаз вуйи пешкешарра тувнийи. Рякъюз ккунийкIан учвуз, фукьан шад гъахьнийиш му йигъан циркдин мектебдин бицIи хялар! Серенжемдин кьяляхъ цирковой мектебдин директорин заместитель Камиль Аьбдулкеримович Къурбановдихъди сюгьбат гъубхнийза. Думу, Дагъ. Огни шагьриъ ерлешмиш дубхьнайи цирковой мектебдин бина диву ва дидин сарпи директор гъахьи Камиль Агъакеримович Къурбановдин хтул ву.
– Узу бицIидимидитIан ич аьхю аба Камилихъди, хъасин йиз адаш Аьдулкеримдихъди гъюри, мектебдихъди аьлакьа айир вуза. Му мектеб бицIидариз гьаммишан шадвал хурайи йишв ву. Гьеле ич аба чIивиди миди, дугъахъди йикьрар дапIну, мектебдиъ бицIидариз бахш вуйи мицисдар ужувлан мяракйир апIуз хъюгъюр Айваз Рамазанов вуйи. Дугъу гьаму аьдат – Йифун абайин палат алабхьну, ЦIийи йисандин пешкешар хьади гъювал – гъира давам апIура.
Гьамусяаьт Кьибла Дагъустандин шагьрариан, районариан вуйи бицIидарихьан, Йифун аба фуж ву кIури гьерхиш, варидари «Айваз аба» кIуру. Чухсагъул дугъаз! Айваз Рамазанов, шлин уьмрин яшайиш читин гьялнаъ аш, гьадму касдиз хил гьачIабккурайи кас ву. Дугъу саб вахтнара миллетар жара апIури гъахьундар. Дурар вари ихь бицIидар ву, кIури шулу дугъу.
Аьхиримжи йисари, му касдихъан нумуна бисури, хайлин тешкилатар, фондар мяргьяматвалин ляхнихьна илтIикIна. Гьадрарин цIарнаъ Табасаран театрин коллективра а.
«Абайин юрд уьбхрюдар» Гьюкуматдин фонднан Дагъ. Огни шагьрин филиали ляхин гъабхурайи Айшат Султаниевайиз ва Дагъустан Республикайин «Дагъларин кIваин уьбхювал» жямяаьтлугъ тешкилатдин вакил, СВО-йин иштиракчи ихь ватанагьли Аьбдулла Мягьямедовдиз гъи ич мектебдиз хяларди дуфнайи бицIидариз мициб шадлугънан серенжем тешкил апIбаз аьхю чухсагъул пуз ккундузуз…
«Гъи ухьу бицIидариз туврайи кюмек, фикир вари гележег бадали апIурайиб вуйихь. Ухьу улупу рякъди гъягъиди ихь бицIидарра. Гъи му серенжемдиъ иштирак гъахьи бицIидарин вари абйир хусуси метлеб айи дявдин операцияйиан, гъалиб духьну, кьяляхъ гъюри, – гъапнийи Камиль Къурбановди.
