Зубайдат Шябанова
Урусатдиъ 1993-пи йисланмина башламиш дапIну, 12-пи майди варихалкьарин медсестрйирин йигъ къайд апIура. Больницайиъ, поликлиникайиъ вая ФАП-диъ лихурашра, медсестра духтрин арчулну хилик гьисаб ву. Дугъан пишекарвали дережайикан, ляхнихьна вуйи янашмиш’валикан иццурайидарин сагъламвал асиллу шула.
Машквран йигъари Санкт-Петербург шагьриъ ерлешмиш дубхьнайи Ленинграддин областдин клинический больницайиъ лихурайи ихь ватанагьли медсестра Эмнеханум Керимовайикан бикIуз ккундучуз. Больницайиъ ляхин апIура бицIи вахтнан арайиъ табасаран шуру, чав лихурайи аьхю коллективдиъси, иццурайидарин арайиъра ужуб гьюрмат гъазанмиш дапIна.
БицIивахтнахъанмина Эмнеханумди инсанариз кюмек тувру, жямяаьтлугъдиз хайир кайи медицинайин вая мялимвалин пишйирикан фикир апIури гъахьну. Багъри гъулан мектеб гъизилин медализ ккудубкIну, дугъу сифте медицинайин колледждиъ, хъасин институтдиъра урхуз ният апIуру. Мектебдиъси, колледждиъра Эмнеханум заан аьгъювалар гъадагъбиин, кадабгънайи пише бинайиан дубгъбиин машгъул вуйи. Колледжра дугъу уьру дипломдиз ккудубкIуру.
Эмнеханум Табасаран райондин АхьитI гъулаъ бабкан гъахьну. Дугъан адаш Радик Шихялиев АхьитI гъуланмектебдиъ физикайин дарсар кивру мялим, хъа дада Зельфира хулан ляхнариин машгъул вуйи аьдати табасаран дишагьли ву. Хизандиъ Эмнеханум веледарикан варитIан аьхюнур ву. Дугъаз кьюр гъардашра а.
«Дюзди гъапиш, адаш фуну ляхниз вушра жавабдар ва учу гьаммишан мектебдиз вари дарсарихьна гьязурди душну ккунир вуйи. Думу ич классдин руководительра вуди гъахьну, гьаддиз жара урхурайидариз дарди, узуз цIиб гъагъиди адабхъури гъахьунзуз – узу имбу урхурайидариз нумуна духьну ккунивал гьисс апIури гъахьунза. Мидлан гъайри, адашдин чве Эфенди Шихялиевра мектебдин завуч, учуз обществознаниейин дарсар кивру мялимра вуйи. Дурарихьна мектебдиъ, гъулаъ айи гьюрмат рябкъруган, дурарин фикрихъ ва гафнахъ агьалйир хъпехъруган, узура мялим хьидиза, кIури шуйза. Гьацира йиз сарпи мялим Маида Рягьимовайин дарсар, дугъан урхурайидарихьна вуйи ккунивалин мани гьиссар, дугъан саламатвал гъира кIваин илмийиз. Гьацдар ужудар ва чпин ляхнихьна жавабдар инсанар рякъруган, жвувазра дурариз ухшар хьуз ккун шулу.
Заан классариз удучIвган, адашди ва дадайи учу медицинайин цирклин пише гъадабгъуз гьаъруваликан гъапнийи. Думуган узура медицинайикан фикрар апIуз, думу цирклиан китабар ва литература урхуз хъюгънайза. Мектеб ккудубкIбан кьяляхъ, Санкт-Петербургдиъ айи ич багахьлуйири адашдикан ва дадайикан узу думу шагьриз урхуз гьауб ккун гъапIиган, рази гъахьнийза. Гьадму шагьриъ узу Гьюкуматдин медицинайин 2-пи нумрайин колледж ккудубкIнийза. Гьамусяаьт йиз чвуччвура Санкт-Петербург шагьриъ Гьюкуматдин медико-технический колледждиъ урхура», – ктибтнийи Эмнеханумди.
Къайд дапIну ккундуки, Эмне-ханумди урхурайи йисари дугъан абйир-бабариз, шуран аьгъюваларихьна вуйи аьшкь, дугъан дагълу дишагьлийирин марцци намус ва тербия кIул’инди къайд апIури, колледждин дирекцияйихьан чухсагъулин кагъаз гъафну. Гьамус дугъан тярифар думу лихурайи больницайиан ерхьуру. Му гафар узу гьавайиди кIурайидар дариз. Улихьнаси узу саб метлеб ади думу больницайиз гъушнийза. Узу Дагъустандиан вуйи табасаран дишагьли ва журналист вуйиб мялум гъабхьиган, душваъ швнур-сари узуз, Эмнеханумдин ччвур бисури, дугъан инсанарихьна вуйи гьюрматнакан, гъайгъушнакан, кюмекнакан ва рягьимлуваликан тярифар гъапIу. Дюзди кIурза, йиз шурхъанси думуган багъри табасаран шурхъан, дамагъвал гьисс гъапIнийза. Баркаллагь увуз, Эмнеханум!
Гъубшу йисан октябрь вазли Эмнеханумди СиртIич гъул’ан вуйи Рамазан Керимовдихъди хал-хизан ккебгъну. Рамазанди Санкт-Петербург шагьриъ Росгвардияйин дестейиъ гъуллугъ апIура.
Гъит дурарин жигьил хизан бахтлуб, берекетлуб ва кIван мурадарихъ хъуркьруб ибшри.
