Зубайдат Шябанова
Дагъустандин образованиейин ва илимдин министерствойи, мектебариъ бажаранлу классдин руководителар ашкар апIбан ва тербияйин ляхнин тажруба мюгькам апIан метлеб ади, гьар йисан «ВаритIан ужур классдин руководитель» конкурс гъабхуб аьдатнаъ ипна.
Гъябгъюрайи йисан республикайин мектебариъ дарсар киврайи мялимарин арайиъ варитIан ужур классдин руководитель гъядягъбан конкурсдин муниципальный дережайин пайнаъ 750-тIан артухъ мялим иштирак гъахьну. Дурарикан 35 мялим республикайин дережайин очный пайназ удучIвну.
Конкурсдин аьхиримжи пай 4-пи ва 5-пи майди Каспийск шагьриъ Республикайин образованиейин центрин бинайиин гъубшнийи. Очный турин натижйириинди республикайиъ варитIан ужур классдин руководитель Табасаран райондин Хянягъ гъулан мектебдин мялим Гюльнара Мягьрамова гъахьну. ВуйиштIан, му гъалибвал Гюльнарайин мялимвалин тажрубайиъ сабпиб дар. Миржид йис мидиз улихьнара думу гьаму конкурсдиъ райондин этапдиъ гъалиб гъахьнийи. Амма жюрбежюр себебариан дугъхьан думуган республикайин дережайин пайнаъ иштирак хьуз гъабхьундайи. Мидланра гъайри, дугъахь урхурайидар муниципалитетдин ва республикайин дережайиъ гъягъру жюрбежюр конкурсариъ иштирак шула ва гъалибвалин йишвар гъадагъура. Думу 9-пи «в» классдин руководител ву.
Мектебдиъ Гюльнара Мягьрамовайи биологияйин дарсар кивра, агроэкологияйин, финансарин аьгъювалариан ва театрин устадвалиан кружокар гъахура, гьацира бицIидарихъди тарихдин ахтармишариан проектар гьязур апIура. Гюльнара Адамовна Мягьрамова Дагъустандин Огни шагьриъ бабкан гъахьну. Дугъан абйир-бабар Дагъустандин Огни шагьриз Табасаран райондин Къужникк гъул’ан кюч гъахьидар вуйи. Гюльнара 4-пи нумрайин уьмуми образованиейин мектебдиъ ва, гьаддихъди сабси, шагьрин искусствйирин мектебдин фортепианойиан аьгъювалар туврайи музыкальный классдиъ урхури гъахьну. БицIивахтнахъанмина вари терефариан аьгъювалар гъадагъуз ккуни Гюльнарайи сифте искусствйирин мектеб уьру дипломдиз ккудубкIну, хъа 2008-пи йисан уьмуми образованиейин мектебдиъ гъизилин медаль гъадабгъну. Гьадму йисан адашдин ва дадайин теклифниинди Гюльнарайи Мягьячгъала шагьриъ ДГУ-йин психологияйин ва экономикайин факультетариз документар тувру ва кьюбиб факультетарикра кахъру.
«Узу кьюбиб факультетариз кьабул гъапIган, рази гъахьнийза, амма дурарикан фунуб ктабгъуруш, фикрарикк ккахънийзу. Йиз адашди, кьюбибдиъра урх кIури, насигьят туву. Йигъну лисузкьан сабдиъ, хъасин, жара студент шубарихъди, хябяхъдин дарсариз кьюбпи факультетдиз гъягъюри гъахьунза», – кIваин апIура Гюльнарайи.
Къайд дапIну ккундуки, Гюльнарайин адаш Адам Мя-гьямедович гизаф фикирлу, аькьюллу ва чан шубрид шубарикан аьгъювалар гъадагъуб тIалаб апIру инсан ву. Думу саб вахтна Дагъустандин Огни шагьриъ шюшйирин заводдиъ инженерди лихури гъахьнийи.
«Мектебдиъ урхурайган, узу шагьрин ва республикайин хайлин конкурсариъ, олимпиадйириъ иштирак шуйза. Адаш йиз аьгъювалариин, хъуркьувалариин разиди шуйи, дугъу уз’инди дамагъ апIуйи. Думу хъана рази апIурза кIури, имбубсана аьшкь кади дарсар дургъуйза. Йиз хъуркьувалариъ адашдин баркаллу тербияйи аьхю роль уйнамиш гъапIну. Дугъаз ва йиз дада Самназдиз чухсагъул пуз ккундузуз. Дурари туву насигьятар ва тербия узу гъи йиз веледаризси, мектебдиъ йиз классдин баяр-шубаризра тувраза», – ктибтура бажаранлу мялимди.
ДГУ-йин кьюбиб факультетарра Гюльнара Мягьрамовайи уьру дипдомариз ккудукIну.
Университет ккудубкIнайи жигьил риш Дагъустандин Огни шагьриъ гъуншйирихьна душнайи вахтна, гьадина хялижвди дуфнайи Ругуж гъулан бай Рамазан Мягьрамовдиз рякъюру. Саб-кьюб вазлилан жигьилари сумчир дапIну, хал-хизан ккебгъру. Гъи дурариз кьюр бай ва сар риш а. Гьадму йисан Гюльнара Ругуж гъулаъ мектебдиъ психологди дийигънийи. Москва шагьриъ тажруба гъадабгъбан кьяляхъ мектебдиъ «Точка роста» кабинет кIули гъабхуз ва, биология дарсарин пишекарвалин квалификацияра гъадабгъну, думу предметдиан дарсарра кивуз хъюгъну. Дугъу бицIидарихъди гъабхурайи баркаллу ляхниз райондин образованиейин управлениейин кIулиъ айидари, мектебдин дирекцияйи ва мялимари гьаммишан заан кьимат тувра. Гьамусяаьтра дугъу чан ученикар райондин олимпиадайиз гьязур апIура. Хъа улихьна йигъари гъабхьи конкурсдикан чан фикрар ачухъ апIури, Гюльнара Мягьрамовайи гьамци гъапну:
«Конкурс кьюб пайназ жара дапIнайи. Сабпи пайнаъ мялимари ученикарихъди дарс дубхну, кьюбпи пайнаъ мялимди жюрийин суалариз жавабар тувну ккундийи. Кьюбиб паярианра конкурс лап маракьлуди гъубшнийи. БицIидарра, мялимарра бегьем гьязур духьнайи. Дюзди кIурза, узуз, мялимдизси, конкурсдин иштиракчйирик Дербент райондин КIежюх гъулан мектебдин бицIидарин ва мялимдин сягьнийир кьабул гъахьунзуз. Дурар улихьнаси Москвайиъ конкурсариъ иштирак гъахьидар ва республикайиъ гъалибвалар гъадагъдар ву. Ич дарснан кьяляхъ учухьнара хайлиндар гъюри, учу лап маракьлуди гъубхуваликан ва ужуйи гьязур духьнайиваликан кIури гъахьну. Жюрийира кьюбиб паяриъ варитIан заан баллар учуз дивнийи. Му гъалибвал сар узу ваъ, вари йиз классди гъадабгъуб ву», – гъапнийи сюгьбатнан аьхириъ Гюльнара Мягьрамовайи.
Гъит, бажаранлу мялимдин ва дугъан классдин гележегдиъ хъана аьхю хъуркьувалар ишри.
