Б.Н. Къурбанов,
Халагъ гъул
Гьюрматлу ватанагьлийир! Гъюрайи 2025-пи йисаз вуйи подпискайин вахт гъябгъюра. Фицдар фикрариинди газатариз, журналариз подписка апIбаъ ухьу иштирак шула? Газатариъ, журналариъ туврайи хабрариан жвуван райондиъ, республикайиъ, уьлкейиъ гъягъюрайи гьядисйирихъди, халкьдин яшайишдиъ шулайи дигиш’валарихъди, жямяаьтлугъ ляхнарихъди, ужувлан касарин хайирлу ляхнарихъди таниш шулухьа. Жвуван чIалниинди удучIвру газатарихъди, журналарихъди алакьалували табасаранар вуйивалин рюгьнан тIалаб тамам апIурухьа. Мидланра савайи, бабан чIал либхбиинди ихь миллет ккубтIбахьан уьбхбан гъайгъушнак жвуван пай киврухьа.
Аьхиримжи йисари, вари дагъустан миллетарин чIаларси, табасаран чIалра, чав ишлетмиш апIурайидарин кьадар цIиб шулайивалиан ва гъулариъ имбударра урус чIалнахьинди илтIикIурайивалиан зяиф шула. Гизафдари гьисаб апIурайиси, думу 50-100 йисаз ккубтIбахьна рякъюъ а. «Гъи гъайгъу дизригиш, закур бала гъюру» кIул али макьалайиъ (сентябрин 2023-пи йисандин «Табасарандин нурар» газат) Мейлан Нежефовди чIалнахъан гаф апIуз, чIал уьбхюз табасаранариин фикир алапIура. Гьадму гьисабнаан, чIал уьбхбаз, дидихьна тамаши ади халкь дебккбаз багъри чIалниинди удучIвурайи газатар-журналари аьхю кюмек тувру. Ялгъуз дурарин эгьемиятлувал, халкь дурарихъди сигъ аьлакьайиъ хьувалиъ, яна газатариз, журналариз подписка апIувалиъ а.
Шли-вуш улихь ккимиди гафниинди кIваин дарапIиш, гизафдар гъафилди, фикир тутрувди, гъавриъ адарди гъузру. Макьала бикIбан метлеб гьарсаб табасаран хизандиз жвуван чIалниинди удучIвру изданйириз подписка апIуз кIваъ ипуб ву. Гьаддиинди ухьу ихь чIал, ихь миллет уьбхбак жвуван пай киврухьа. Мициб саягъниинди жвуван чIал ва миллет уьбхюб, яракьдихьди уьбхюбтIан агъзур ражари рягьти ва натижалу саягънан рякъ ву.
Табасаран хизанарин кьадарназ ва жвуван чIалниинди чапдиан удучIвурайи газатарин, журналарин тиражариз фикир тувхьа. Хизанар 50 агъзурихьна а, хъа, мисалназ, «Табасарандин нурар» газатдин тираж анжагъ 2000-тIан дар. 48000 табасаран хизанариъ думу газат урхурадар. Сарихъди гафар гъапIунза.
– Жвуван чIалнан чапдиан удучIврудариз подписка гъапIуна?
– Ваъ, гьаз вухъа дурар?
– Хъа бабан чIалнахьна фициб янашмиш’вал аяв? ЧIал гъубзну, уьбхну ккундунуз?
– Хъа, жвуван халкьдин чIал даккунди шулин?!
– Ари чIал гъубзну ккунири, дидихьна жвуван хизандин, баяр-шубарин уьбхбаз гъайгъушин артмиш апIури, думу газатар-журналар жвуван хизандиъ урхури ккунду.
Ав, дяви гъябгъюра, амма гъийин дявди, немцарихъди вуйи дявдиси, подписка апIуз пул гьудрубкIрувал арайиз дубхнадар. Вижнасузди гъузрахьа. Гьарсаб хизанди жвуван чIалниинди удучIвру 5 жюре газат ва журнал гъадагъури ккунду.
Ужуб ляхниъ сатIи йихьай, табасаранар! Гьарсаб хизандиз – газат ва журнал!
