Мейлан Нежефов
Инсанди дугъриди ва намуслуди зигурайи чан зегьметназ жямяаьтдин, улихь-кIулихь хьайи гьякимарин ва гьюкуматдин терефнаан фикир, кьимат тувруган, хъана артухъди лихуз аьшкь гъюру.
Аьхиримжи йисари культурайин цирклиъ лихурайи пишекрариз гьациб дикъатлу фикир туврайи «Дагъустандин рюгь» кIуру фестиваль тешкил дапIну, кIули гъабхура. Фестивалин варж агъзур манат пул улупнайи сертификатдин ва дипломдин сагьибарин дестейиъ ихь ватанагьлийирра рякъюрахьуз, ва мид’ин кьадарсуз шад вухьа.
Магьа цци дурарин cиягьназ имид-амдар 40 йис культурайиз бахш дапIнайи ва думу рякъюъ баркаллагьниинди ляхин давам апIурайи Хив райондин культурайин цирклин гъуллугъчи Кабир Гьяжиевра (шиклиъ) дахил гъахьну.
Кабир Сабирович Гьяжиев 1964-пи йисан 1-пи июлиъ Хиварин гъулаъ бабкан гъахьну. 1982-пи йисан багъри гъулан мектебдин 10-пи класс ккудубкIну, думу Дагъустандин культурайин училищейин актервалин отделениейик урхуз кучIвру ва 1985-пи йисан заан дережайин аьгъювалариинди урхуб ккудубкIуру. Гьадму йисан, 11-пи майдихъанмина тап гьамусдизкьан багъри гъулаъ культурайин хулаъ жюрбежюр гъуллугъарихь лихура.
Узу макьала бикIурайиган, Кабир Гьяжиевдин гьякьнаан дугъан гъарашугъарихьанра гьерхуб-хъерхуб гъапIнийза.
«Кабир халу къад йистIан артухъ автоклубдиъ лихури гъахьну. Янаки клуб адру гъулариз, халачачйирихьна фабрикайиз, малар-марччарихъ хъайи габнарихьна галар-сивариз, укIар-кIажар сикин апIурайи нежбрарихьна йишвариина гъягъюри, дурарихьди эрг’вал йивуз ва шадвал апIуз гъитри гъахьну. Хъа гьамус къад йис ву райондин культурайин хулаъ «Халкьдин театриъ» лихури. Гъарашугъарихъди гаф-чIал гъапIу вахтна дугъан кандидатура премияйиз улупуз саринра къаршувал гъабхьундайи. Ари гьамди субут апIура дугъан зегьметнан лайикьлу рякъ», – гъапнийи Хив райондин культурайин отделин кIулиъ айи Казбек Къазиевди.
Кабир Сабировичдикан улхуб давам апIури, театрин режиссер-постановщик Сервер Уьмаровди, думу дугъриданра культурайиз зав’ан ирхнайир ву, ктибтнийи.
«Ав, кIваантIан кIураза, гъи культурайихьна, фольклорин тарихдихьна, медениятдихьна, чIалнахьна вуйи лигувал жараб дубхьнайиган, Кабир Сабирович думу ирс ихь арайиан дудрубгуз чарйир зигурайидарикан сар ву. Эгер уз’ин алиб вуйиш, валлагьи, дугъаз ухдитIан «Халкьдин артист» ччвур тувуйза. Гьарсар касдин кьисмат бабкан шлуган дибикIнайиб ву. Гьаци гъабшиган, му кас бабкан шлуган, театриз дупну халкь гъапIур ву. Сягьнайиин чаз фициб роль улупнашра, кабир Сабировичди думу, дучIвубкьну, инсанарихьна гьисс апIру кIалибниинди рубкьуру.
Театрин актериканси, дугъан инсанвалин шартIариканра пуз кккундузуз. Халкьдиз шадвал хуб, рякъ-хулиъ алахъу-гьахъуриз гьюрмат апIуб, дугъан хликк ккайи гъагъназ кюмек тувуб, хил бисуб мугъан ифдиъ айиб ву. Табиаьтди тувнайи савкьат ву чаз. Мицир дуст узухъ хъиршбаз йиз кьисматназ чухсагъул кIураза», – гьисслуди гъапнийи Сервер Уьмаровди.
Кабир халу ужур актерси, халис табасаран жямяаьтлугъ касси, баркаллу хизандин кIул’ин али жвира ву. Дугъу чан уьмрин юлдаш Гюлдесте Гьяжибековнайихъди юкьур велед (кьюр байна, кьюр риш) дюрхну, дурариз образование тувну, арайиз адагъну, дурарикан халис хизан-кюлфетдин адмийир ктаъну. Гъи дурари миржир хтулра тербияламиш апIура.
Гьарсаб табасаран хизандианси, Кабир халуйин хизандианра ихь Ватан уьбхру игит удучIвну а – дугъан аьхюну бай Мягьсум СВО-йин иштиракчи ву.
Премия тебрик апIбан мани гафарихъди, ичв хизандиз мублагъвал ва хушбахтвал ккун апIураза, гьюрматлу кас.
