Мейлан Нежефов
Улихьна йигъари Хив райондин Хив гъул’ан вуйи пауэрлифтинг спортдин жюрейиан дюн’яйин чемпион Зелимхан Пашаевди райондиз сабсан ражну сабпи йишв гъазанмиш гъапIну.

 

Дидкан узу Зелимхандикан «Табасарандин нурар» газатдиз ктибтуб ккун гъапIнийза.

«Красноярск крайдиъ кIули гъубшу чемпионатдин талитариъ пауэрлифтинг жюрейин спортдиин машгъул духьнайи 200-тIан артухъ спортсменар иштирак гъахьнийи. Асас вуди спортсменарин яшар 25 йислан 40 йис’инакьан вуйи. За апIурайи гъагъ 190 кг вуйи. Магьа нубатнан ражарира сабпи йишв ухьуз кьисмат гъабхьну (разиди кIура). Гьамус, Аллагьдин амриинди, ктабхъурайи йисан 14-пи декабриъ Москвайиъ вари дюн’яйин чемпионатдиъ иштирак хьуз ният айиз», – кIура ихь пягьливни.

КIваин апIуз ккундузуз, пауэрлифтингдиан Зелимхан Пашаевди ургубан райондиз сабпи йишвар духна. Му сиягь давам апIури, декабриъ кIули гъягъру дюн’яйин чемпионатдиъра дугъу чав лайикьлуди гъазанмиш гъапIу «дюн’яйин чемпион» ччвур хъана тасдикь апIрувалик миж кивурхьа.