Майин 29-пи йигъан Дагъустандин Глава Сергей Меликов Дагъустандин Халкьдин Собраниейиъ аьдати Послание хьади удучIвиди.

Серенжем яркьуди кIули гъябгъиди ва Посланиейихъ хъпехъуз ерли парламентдин депутатарилан, Госдумайин депутатарилан, гьюкмин органарин кIулиъ айидарилан савайи, блогерар, жямяаьтлугъ касар ва журналистар уч хьиди.

Региондин кIулиъ айири республика артмиш апIбан бадали сабпи нубатнаъди дийигънайи месэлйир гъитIирккиди. Экспертарин гьисабариинди, асас фикир хусуси метлеб айи дявдин операцияйин иштиракчйириз ва дурарин хизанариз, цIийи карханйир ва яшайишдин дараматар тикмиш апIбаз, туриствалин ва гъулан мяишатдин цирклар артмиш апIбаз тувди. Йигъан гьял дапIну ккуни месэлйирин арайиъ жандин сагъвал адру сакьат инсанар, йитим бицIидар яшамиш шлу хуларихъди тямин апIбан, рякъяриъ айи камерйирин, Мягьячгъалайиъ Имам Шамилин ччвурнахъ хъайи кюче рас апIбан месэлйир а. Посланиейихъ хъпехъуз ккунидариз «прямая трансляция» тямин апIиди.

Посланиейин натижйириз дилигну, Дагъустандин Главайи мялуматарин дакьатарин вакиларихъди пресс-конференция гъабхуб планламиш дапIна.