17-пи мартди Дагъустан Республикайин премьер-министр Аьбдулмуслим Аьбдулмуслимовди региондин правительствойин заседание кIули гъубхну. Думу сабпи ражари вуди онлайн къайдайиинди кIули гъубшнийи, ва серенжемдиз гьарсар дагъустанлуйихьан лигуз шуйи.
Заседаниейиъ 2024-пи йисан гьяракатниинди уьмриз кечирмиш дапIну ккуни проектарикан, улихь дийигънайи месэлйирикан, инвестицйирин политикайикан ва жара месэлйирикан гъулхнийи.
РД-йин жиларин ва хусусиятнан аьлакьйирин министр, Правительствойин председателин заместитель Заур Эминовди региондин карханйириъ айи аьгьвалатнакан доклад гъурхнийи. Дугъу туву мялуматариинди, 2025-пи йисан республикайин бюджетдиъ эйсивалиъ айи карханйирин мянфяаьтлувал за апIбаз 725 миллион манат улупна.
Аьбдулмуслим Аьбдулмуслимовди региондин экономикайин артмиш’валин бязи иштиракчйирин ляхни лап цибтIан мянфяаьт хури адруваликан гъапнийи. Дугъу июлин 1-пи йигъ улубкьайиз думу жюре мяишатарин гьякьнаан теклифар гьязур апIуб табшурмиш гъапIну.
Заседаниейиъ гьацира чпин хушниинди ляхин апIрударин месэлара гъитIибккнийи. Дагъустандиъ 70 агъзур кастIан артухъ волонтерар а. Премьер-министри 2030-пи йисаз Дагъустандин гьарсаб муниципалитетдиъ чпин хушниинди жюрбежюр ляхнар апIуз гьязур вуйидарин центрар ачмиш апIуз табшуругъ тувнийи. Гъийин йигъаз республикайиъ дицисдар 19 центр а. Волонтерари шубуд йисандин арайиъ ужувлан 3746 ляхин тамам дапIна.
«Яшнакан асиллу дарди, гьарсар касдихьан волонтер хьуз шулу, хъа тажрубайи улупурайиси, волонтерарин гьяракатнан бина вузариъ а. Мектебарин заан классариъ, колледжариъ урхурайи баяр-шубар жалб апIури, думу ляхин давам апIуб чарасуз ву. Волонтервалин ляхни баяр-шубариз пише ктабгъуз кюмек апIиди», – гъапнийи министрарин кабинетдин кIулиъ айири.
РД-йин Правительствойин заседаниейиъ региондин медицинайин идарйирик кредитарин буржар кайивалин месэлара гъитIибккнийи. Аьбдулмуслим Аьбдулмуслимовдик къурху кипрайи месэла гьадму вуки, буржар цIиб шуладар, аьксина, дурар артухъ шула.
Региондин премьер-министри думу месэла Оперштабдин РД-йин Глава Сергей Меликов иштирак вуйи заседанйириъра швнубна саб ражари за дапIнайиваликан ва табшуругъар тувнайивалдикан гъапнийи.
Дагъустандин правительствойи гележегдиъ медицинайин идарйирик буржар дархьбан, гьацира бюджетдин дакьатар харж апIбан мянфяаьтлувал за апIбан бадали, медицинайин идарйирин финансарин ляхнин гюзчивал гъабхуб давам апIбанди ву.
