Наргиз Гюлечова
27-пи сентябриъ Мягьячгъала шагьрин кьялан майдандиин Мюгьяммад пайгъамбар (саллаллагьу аьлайгьи васаллам) бабкан хьбаз бахш дапIнайи республикайин мевлюд кIули гъубшну. Серенжем Дагъустандин Главайинна муфтиятдин ва РД-йин Халкьдин Собраниейин депутат Мягьямед Мягьямедовдин кюмекниинди тешкил гъапIуб ву.

Республикайин варитIан аьхю мевлюднаъ Мюгьяммад Пайгъамбрихьна (саллаллагьу аьлайгьи васаллам) чпин гьюрмат ва ккунивал улупури, 15 агъзуртIан артухъ агьалйир иштирак гъахьнийи. Мина дуфнайи вари хялариз гьязур дапIнайи дюгдин аш (плав-аш) ва хъанара жара шей’ар тувнийи.

 

Серенжемдиъ иштирак духьнайидарин арайиъ республикайин политикар, спортменар, диндин гъуллугъчйир, гъулар шагьрарин имамар ва жара касар айи.
Уч духьнайи мусурмнар му йигъахъди тебрик апIури, Дагъустандин правительствойин председателин заместитель Рамазан Жяфаров, Мягьячгъала шагьрин мэр Юсуп Умавов, Дагъустандин Главайин кюмекчи Мягьямед Гьяжимягьямедов, республикайин муфтийдин заместитель, ислам диндин илмарин духтур Аьгьмед Мягьямедов ва хъанара жара гьюрматлу касар удучIвну гъулхну.

Республикайин аьхю мевлюднаъ Кьур’андиан вуйи хайлин сурйир ва нашидар гъурхнийи.
Мидланра гъайри мажлисдиз агъзрариинди уч духьнайи касари вариди сатIиди хъипри, зикр ва салават гъурхну.