Зубайдат Шябанова
Гъубшу 2023-пи йисан Табасаран райондиъ 130-тIан артухъ километр манзил рякъ рас гъапIну, дурарикан 8 километриин асфальт улубзну.

Асас ляхнар Дербент–Хючна–Хив (16-65 километр), Мамедкъала-Хючна (7-27,8 километр), Хюрикк гъулан терефназди вуйи Хючна–Хьарагъ, гьацира федералин «Кавказ»–СиртIич–ТIаттил машинарин рякъяриъ гъурхну.
«Ухьу Акъа гъулаз гъябгъру, Гьесихъ гъул’ан СертIилна вуйи, Къужниккан Хьарагъна, Халагъ гъулаз вуйи терефнаъ, Хючна–Хьарагъ рякъ’ан Хянягъ гъулан мистахьнакьан вуйи рякъяр рас гъапIунхьа.
Хючна гъулан рякъярра къайдайиз гъахунхьа. Жяфаровдин, Ильдаровдин, Ражабовдин ччвурарихъ хъайи кючйириин асфальт улубзуз мумкинвал гъабхьну.

Мидланра гъайри, Арак, ЦIанак, Бургьанкент, Кувагъ, Дарвагъ, Ярса, Мягьрягъ, СиртIич, ГьепIил, Хили-Пенжигь ва Куркакк сельсоветдин 5 гъулан рякъяр къайдайиз гъахунхьа», – гъапнийи Табасаран райондин глава Мягьямед Къурбановди.
Табасаран райондин аьтрафариин али рякъяр 2023-пи йисан рас апIбан ляхнариз 400 миллион манат харж удубчIвну.
Мягьямед Къурбановди къайд гъапIганси, райондиъ уч гъапIу транспортдин налог республикайин правительствойи муниципалитетдин рякъяр рас апIуз кьяляхъ тувра. «Гьамдихъди аьлакьалу вуди, вахтниинди налог тувувалиинди, администрацияйин ва жямяаьтдин кюмекниинди, райондин инфраструктура къайдайиз хуз, гьадму гьисабнаан гъуларин рякъяр рас апIуз мумкинвал шулахьуз», – гъапнийи райондин кIулиъ айири, агьалйириз вахтниинди транспортдин налогдин бурж тувуб кIваин апIури.