Зубайдат Шябанова
Гъубшу гьяфтайиъ Дагъустандиъ гъургъу мархьари республикайин саки вари шагьрарин ва районарин рякъярин инфраструктурайиз аьхю зарар тувну. ВаритIан гъагъи аьгьвалат Мягьячгъала, Дербент ва Дагъустандин Огни шагьрариъ арайиз гъафну. Саб дакьикьайизкьан ктIитIибкIди кьюд йигъандин арайиъ ургъурайи мархьари шагьрарин кючйир штари ккаъну. Кючйириъ бязи йишварихь шид гьацI метртIан артухъ за гъабхьну. Думу шагьрариъ гизаф мертебйирин хуларин подвлариан гьамусяаьтра штар адацIури ва селлери пуч гъапIу рякъяр рас апIури ими.
Дагъустандин МЧС-дин управлениейи туву мялуматариинди, республикайин хьуб район – Агъул, Ахцегь, Дукъузпара, Рутул ва Къурагь – гъира гъагъи аьгьвалатнаъ гъузна.
Думу районарилан гъайри, 16-сана райондиъ, гьадму гьисабнаан Табасаран, Сергогъала, Гуниб, ЦIунтIа, Лак ва жара районариъ, мархьли туву зарар аьхюб гъабхьну. Душвариъ селлери ва аьхю штари къайдайиан идирчу рякъяриъ расвалин ляхнар гъахура. Республикайиъ аьхю мархь убгъурайи йигъари электросетарин цирклиъ авария дархьуз 294 аьдад техника, 678 гъуллугъчи ва 2 агъзуртIан артухъ пишекрар, рякъяр къайдайиз хури, йишвариин лихури гъахьну.
Табасаран райондин глава Мягьямед Къурбановдин табшуругъниинди муниципалитетдиъ чарасуз гьядисйирин натижйир терг апIру комиссияйин заседание гъабхьну ва машинарин рякъяр къайдайиз хпан план дюзмиш гъапIну.
Ич сюгьбатнаъ «РСУ»-«Табасаранский» АО-йин райондин филиалин инженер Уьсман Аьлимирзаевди къайд гъапIганси, Табасаран райондиъ мархьари республикайин мяна айи Дербент-Хючна-Хив (21-23-пи километриъ) ва Мамедгъала-Хючна (22-23-пи километриъ), райондин мяна айи Хючна-Халагъ 8, 9 ва 10-пи километр рякъюъ, гьадму рякъюн Афна ва Гьесихъ гъуларизди гъюру ва гьацира Хючна-Хьарагъ (8-9-пи ва 12-13-пи километрариъ) рякъяр лап гъагъи гьялназ гъафну.
«Ярса гъул’ан удучIвру йишвахь рякъ’ина селихъди машнакан жил кучвубхну гъафну. Диди Мамедгъала-Хючна рякъ гьадабтIну. Рякъ’ан 200 кубометр грунт адабгъунча.
Заан Ягъдигъна гъягъру рякъ дагъдикан ахьу гъванари хъябкьну. Мягьрягъ гъул’ан Дербент терефназди гъягъру рякъ’ин сел улубчIвбан натижайиъ думу гъвандин гъюрдари ккапIну. Афна гъулазди ва Табасарандин заан гъуларизди вуйи хайлин рякъяриъ, машарикан жилар кучвухну, рякъяр ккаъну.
Техникайин ва рякъяриин лихру пишекрарин кюмекниинди рякъяр къайдайиз хурача. райондиъ гьамциб дюшюшариъ лазим шлу вари техника а. Учу райондин рякъяр гьаммишан гюзчиваликк уьрхюрача. Хъа табиаьтдин завалихьан уьрхюз читинди шулу. Мицисдар дюшюшариъ гъубзрайиб завалин гъанихвалин натижйир вахтниинди марцц апIуб ву», – гъапну Уьсман Аьлимирзаевди.
