Наргиз Гюлечова

Аьхиримжи вахтари Мягьячгъа-лайин «Динамо» футболин командайи ужудар натижйир улупура. Нубатнан ражари вуйи талитар 6-пи апрелиъ Каспийскдиъ айи «Анжи Арена» стадиондиин Урусатдин премьер лигайин (РПЛ) 23-пи турин дахилнаъди кIули гъушну. Думуган «Динамо» (Мягьячгъала) ва Подмосковьейин «Химки» командйир гюрюшмиш гъахьнийи.

 

Гьарганси му ражарира стадиондиз жвуван командайихъанди юкIв убгурайи саки 6 агъзурихьнакьан тамашачйир уч гъахьнийи. Футбол ккебгъну 16-пи дакьикьайиъ ихь командайиъ айи Словенияйиан вуйи футболист Ян Джапойиз аьхю зиян дубхьну, кIулин тренар Хасанби Биджиевди думу дишлади дигиш гъапIну.

30-пи дакьикьа ккебгъубси, «Динамо» клубдин футболист Эгаш Касинтурайи «Химки» командайиз сабпи гол ипну. Мидин кьяляхъ 5 дакьикьа гъябгъяйизра сабсана гол ихь командайиан вуйи Жаваддира ипну.
Талит аьдатниинди уйнамиш шули айи. Кьюбпи голин кьяляхъ 10-12 дакьикьа арайиан удубчIвайизра, Касинтурайи лик гъиву туп «Химки» командайин футболистдин хили хътапIну, ва ихьдариз пенальти ивуз ихтияр тувну. ИкибаштIан, Гьямид Агъаларовди туп гъапдиъ ипну, гьисаб 3:0 гъапIну.

Матчдин кьюбпи пай ккебгъну цIиб вахт гъябгъяйиз «Химки» клубдин футболист Заболотныйди «Динамойин» гъапдиъ гол ипну, гьисаб 3:1 гъапIну. Амма ихь команда ужуди гьязур дубхьнайиб агъю шуйи. Мици вуйивал Гь.Агъаларовди ипу сабсана голи тасдикь гъапIну. Натижайиъ 4:1 дубхьну, РПЛ-ин 23-пи турин дахилнаъди «Динамо» ва «Химки» командйирин арайиъ уйнамиш’вал аьхирихъна гъафну.

Дюзди кIуруш, ихь команда РПЛ-из удучIвхъанмина «Анжи Аренайиин» гъябгъюрайи гьарсаб футболин уйнамишдиз лигуз гъягъюри шулза. Узу думукьан футболин гъавриъ айи кас даршра, чвлин вазаритIан гьамусяаьтди ихь команда ужуди гьязур духьбнайиб рябкъюразуз. Мици вуйиб дурари хьадукра ирчнайи голари тасдикь апIура. Чвлин вазари 18 ражари талитариз удучIвну ирчу голарин кьадар 11 вуш, хьадукран вазари 5 ражари талитназ удучIвбиинди, ихь футболистари 9 гол ирчна. Вушра, гьелелиг РПЛ-йин турнирин таблицайин улупбариинди, ихь команда 10-пи йишв’интIан алдар.